చిన్నారి గొంతులో క్యారెట్‌ ముక్క

వనపర్తి జిల్లా కొత్తకోట పట్టణానికి చెందిన చిన్నారి పీజా క్యారెట్‌ ముక్క మింగే క్రమంలో గొంతులో ఇరుక్కుపోయింది.

• బ్రాంకోస్కోపీతో తొలగించిన వైద్యులు

కొత్తకోట, మే 11: వనపర్తి జిల్లా కొత్తకోట పట్టణానికి చెందిన చిన్నారి పీజా క్యారెట్‌ ముక్క మింగే క్రమంలో గొంతులో ఇరుక్కుపోయింది. ఊపిరి ఆడక ఉక్కిరిబిక్కిరి అవుతుండటంతో కుటుంబీకులు పట్టణంలోని రాహుల్‌ మల్టీ స్పెషాలిటీ దవాఖానకు తరలించారు. చిన్నారికి అప్పటికే ఆక్సిజన్‌ శాతం తగ్గి స్పృహ కోల్పోయింది. అప్రమత్తమైన వైద్యులు సీపీఆర్‌ మొదలు పెట్టారు.

నోట్లోకి పైప్‌ పంపించి వెంటిలేటర్‌ సాయంతో కృత్రిమ శ్వాసను అందించారు. డాక్టర్లు మనీషారెడ్డి పర్యవేక్షణలో ఇంటర్నేషనల్‌ పల్మనాలజిస్ట్‌ వెంకట్‌రెడ్డి బృందం ఆధ్వర్యంలో అరుదైన శస్త్ర చికిత్స చేశారు. ఊపిరితిత్తుల మధ్యలో ఇరుక్కున్న క్యారెట్‌ ముక్కను బ్రాంకోస్కోపీ సాయంతో తొలగించారు. 48 గంటల పాటు వెంటిలేటర్‌పై ఉంచి నిరంతరం వైద్య సేవలందించి చిన్నారి ప్రాణాన్ని కాపాడారు.