హైదరాబాద్ సిటీబ్యూరో, డిసెంబర్ 19 (నమస్తే తెలంగాణ): పాస్పోర్ట్ ప్రత్యేక సేవల కోసం శనివారం నిర్వహించిన డ్రైవ్ విజయవంతంగా ముగిసిందని హైదరాబాద్ రీజినల్ పాస్పోర్ట్ అధికారి దాసరి బాలయ్య శనివారం ఓ ప్రకటనలో తెలిపారు. తతాల్ క్యాటగిరీ కింద పాస్పోర్ట్ దరఖాస్తుల సమర్పణ కోసం సుదీర్ఘ నిరీక్షణ సమయాన్ని తగ్గించడంలో భాగంగా అందించిన ప్రత్యేక సేవల్లో 2,600 దరఖాస్తుల ప్రక్రియ పూర్తయినట్టు పేర్కొన్నారు. ఆర్పీవో పరిధిలోని బేగంపేట, టోలిచౌకి, అమీర్పేట, నిజామాబాద్, కరీంనగర్ పాస్పోర్ట్ సేవా కేంద్రాల్లో ఈ సేవలు అందించామని తెలిపారు. 19 నుంచి 23 వరకు ప్రతిరోజు తతాల్ అపాయింట్మెంట్ల కోసం వేచి ఉండే సమయాన్ని తగ్గించడానికి మొత్తం 5 పాస్పోర్ట్ సేవా కేంద్రాల్లో అదనంగా 50 తతాల్ అపాయింట్మెంట్లు విడుదల చేస్తామని వెల్లడించారు. ఈ నెల 24 (శనివారం)న దరఖాస్తులను ప్రాసెస్ చేయడానికి ప్రత్యేక డ్రైవ్ ఉంటుందని చెప్పారు. దరఖాస్తుదారులు ఈ సేవలను ఉపయోగించుకోవాలని కోరారు.