దెబ్బతిన్న పంటల సర్వేలో సర్కార్‌ విఫలం

మురసు తుఫాన్‌ ప్రభావంతో దెబ్బతిన్న పంటలను సర్వే చేయడంలో ప్రభుత్వం, మంత్రులు విఫలమయ్యారని సత్తుపల్లి మాజీ ఎమ్మెల్యే సండ్ర వెంకటవీరయ్య ధ్వజమెత్తారు.

• ఎకరానికి రూ.50 వేల పంట నష్ట పరిహారం అందించాలి
• మాజీ ఎమ్మెల్యే సండ్ర డిమాండ్‌
• దెబ్బతిన్న పంటల పరిశీలన

పెనుబల్లి, నవంబర్‌ 11 : మురసు తుఫాన్‌ ప్రభావంతో దెబ్బతిన్న పంటలను సర్వే చేయడంలో ప్రభుత్వం, మంత్రులు విఫలమయ్యారని సత్తుపల్లి మాజీ ఎమ్మెల్యే సండ్ర వెంకటవీరయ్య ధ్వజమెత్తారు. తుఫాన్‌ కారణంగా ఖమ్మం జిల్లా కల్లూరు మండలం ఎర్రబోయినపల్లి, కొత్త ఎర్రబోయినపల్లి గ్రామాల్లో దెబ్బతిన్న పంటలను రైతులు, బీఆర్‌ఎస్‌ శ్రేణులతో కలిసి బుధవారం ఆయన పరిశీలించారు. ఈ సందర్భంగా సండ్ర మాట్లాడుతూ.. వరి, పత్తి పంటలు పూర్తిగా దెబ్బతిన్నాయని ఆవేదన వ్యక్తంచేశారు.

వ్యవసాయ శాఖ పంట నష్టాన్ని అంచనా వేయడంలో ఘోరంగా విఫలమైందని మండిపడ్డారు. ఉమ్మడి జిల్లావ్యాప్తంగా 34 వేల ఎకరాల్లో పంట నష్టం జరిగిందని చెప్తున్నా ఏ ప్రాతిపదికన అంచనా వేశారో చెప్పాలని డిమాండ్‌ చేశారు. పంట నష్టపోయిన రైతులకు ఎకరాకు రూ.50 వేల చొప్పున పరిహారం అందించాలని, లేదంటే సబ్‌ కలెక్టర్‌ కార్యాలయం ఎదుట ధర్నా చేస్తామని హెచ్చరించారు.