చిలగడదుంప మెంతికూర కర్రీ.. భలే రుచిగా ఉంటుందండీ!

చిలగడదుంపలను పచ్చిగానే తినడమే కాదు కూర కూడా వండుకోవచ్చు. వీటిని ఉడికించి మెంతికూర కలిపి కూర వండితే అబ్బా భలేగా ఉంటుంది. చెబుతుంటేనే నోరూరుతుంది కదూ. దీన్ని ఎలా వండాలో తెలుసుకుందాం.

కావాల్సిన పదార్థాలు

చిలగడ దుంపలు: నాలుగు
మెంతికూర: ఒకటిన్నర కప్పు
నూనె: రెండు టేబుల్‌ స్పూన్లు
నెయ్యి: టేబుల్‌ స్పూను
కారం: టీ స్పూను
పెరుగు: పెద్ద గరిటెడు
ఆమ్‌చూర్‌: అరస్పూను
జీరాపొడి, ధనియాపొడి: అరస్పూను చొప్పున
ఉప్పు: తగినంత

తయారు చేసే విధానం

చిలగడ దుంపల్ని బాగా కడిగి చిన్న గుండ్రటి ముక్కలుగా తరిగి నీళ్లలో వేసుకోవాలి. మెంతికూరను కడిగి సన్నగా తరిగి పక్కకు పెట్టుకోవాలి. ఒక బాణలి పెట్టి టేబుల్‌ స్పూను నూనె, అరస్పూను నెయ్యి వేసి కొంచెం ఉప్పు జోడించి మెంతికూరను వేయించి తీయాలి. ఇప్పుడు అదే బాణట్లో మరో స్పూను నూనె, అరస్పూను నెయ్యి వేసి తరిగి పెట్టుకున్న చిలగడ దుంపలు వేసి, కొద్దిగా నీళ్లు చల్లి మూత పెట్టి మగ్గనివ్వాలి. చిన్న గిన్నెలో పెరుగు తీసుకుని అందులో ధనియా పొడి, జీరా పొడి, ఆమ్‌చూర్‌, కారం, కూరకు సరిపడా ఉప్పు కలుపుకోవాలి. ఇప్పుడు ఈ మిశ్రమాన్ని బాణట్లో పోసి కూరంతా సమంగా కలపాలి. అంతే…. రుచిగా ఉండే చిలగడదుంప మెంతికూర కర్రీ సిద్ధమైపోతుంది.

– ఎం.బాలరాయుడు, పాకశాస్త్ర నిపుణురాలు