మార్కెట్లో మతిమరపు

మీ ఇంటి దగ్గరుండే సూపర్‌ మార్కెట్‌కి తరచూ వెళ్తూ ఉంటారు. ఏదో పని మీద వేరే ప్రాంతానికి వెళ్లినప్పుడు, అదే బ్రాండ్‌ సూపర్‌ మార్కెట్‌ కనిపించింది. ఉత్సాహంగా లోపలికి అడుగుపెట్టారు. కానీ ఓ అయిదు నిమిషాలు తిరిగిన తర్వాత అంతా అయోమయంగా తోస్తుంది. దారి తప్పిపోయామేమో అనిపిస్తుంది. ఇలా మనలో చాలామంది విషయంలో జరిగే ఉంటుంది. ఇందుకు ఓ స్పష్టమైన కారణం ఉందని అంటున్నారు శాస్త్రవేత్తలు. మనలో వస్తువులను గుర్తుంచుకునే శక్తిని ‘స్పేషియల్‌ మెమరీ’ అంటారు. తాళం చెవులు ఎక్కడ పెట్టాం, ఇంట్లో కుర్చీలు ఎటువైపు ఉన్నాయి… లాంటి విషయాలన్నీ ఈ కోవలోకే వస్తాయి. ఇందాక చెప్పుకొన్న ఉదాహరణలో అలవాటైన సూపర్‌ మార్కెట్‌కు సంబంధించిన ‘స్పేషియల్‌ మెమరీ’, కొత్త చోట అడ్డుపడుతూ ఉంటుంది. సహజంగానే ప్రతి సూపర్‌ మార్కెట్లో వస్తువుల అమరిక వేర్వేరుగా ఉంటుంది కాబట్టి, అయోమయానికి లోనవుతాం. దీనికోసం ఓ పరిశోధన అవసరమా అనుకోవడానికి లేదు. అల్జీమర్స్‌ ఉన్నవారిలో స్పేషియల్‌ మెమరీ లోపమే కీలకం. కాబట్టి, ఒకే తరహా సూపర్‌ మార్కెట్లలో నిలబడినప్పుడు… మెదడులో జరిగే చర్యలను గమనించడం ద్వారా ఇతరత్రా సమస్యలకు పరిష్కారాన్ని కనుగొనవచ్చని భావిస్తున్నారు.