మువా పర్వతం.. భూతల స్వర్గం.. చూసొద్దాం మావా!

వియత్నాంలోని నిన్‌బిన్‌లో ఉన్న మువా పర్వతం భూతల స్వర్గంగా తలపిస్తుంది. యునెస్కో ప్రపంచ వారసత్వ కట్టడంగా గుర్తింపు పొందిన ఈ పర్వతాన్ని సందర్శించడానికి విదేశీయులు నవంబర్‌లో భారీగా తరలివస్తుంటారు.

వంకర టింకరగా ఉన్న మెట్ల దారిలో నడుస్తూ మువా పర్వత శిఖరానికి చేరుకుంటే కనువిందైన విహంగ వీక్షణాన్ని ఆస్వాదించవచ్చు. ఆ శిఖరంపై ఉన్న భారీ డ్రాగన్‌తోపాటు ఉభయ సంధ్యలనూ చూస్తూ కాలక్షేపం చేయవచ్చు. గిరి పాదాల చెంత తామరలు నిండిన చెరువు, చుట్టూ కొండలు, వాటి మధ్య బంగారు పంటలు పండే నేలలు మువా పర్వతం భూతల స్వర్గం అనిపిస్తుంది.

యునెస్కో ప్రపంచ వారసత్వ కట్టడంగా గుర్తింపు పొందిన ఈ గిరి కౌగిట గుహలు కూడా ఉన్నాయి. ఈ గుహల్లోకి చొరబడిన నీటిలో చిన్న పడవల్లో సరదాగా ప్రయాణించి రావొచ్చు. వియత్నాంలోని నిన్‌బిన్‌ నగరానికి అయిదు కిలోమీటర్ల దూరంలో ఉన్న ఈ ప్రకృతి సౌందర్యాన్ని చూసేందుకు నవంబర్‌ మాసం అనుకూల సమయం.