Visit:
ఇన్‌స్పెక్టర్‌ రుద్ర అన్ని ప్రశ్నలకు కరెక్ట్‌గా సమాధానాలు చెప్పడంతో భాస్కర్‌ కథను చెప్పడం ప్రారంభించాడు సీఐ శరత్‌. ‘రుద్ర.. నేను నీకు ముందే చెప్పినట్టు 18వ పునర్జన్మ బలిపీఠ యాగానికి విష్ణుమూర్తి జాతకంలో పుట్టి, లింగ మార్పిడి చేసుకొన్న వాళ్లు కావాలి. ఈ భాస్కర్‌ అదే జాతకంలో పుట్టాడు. పైగా పేదవాడు. పెండ్లికాని ఇద్దరు అక్కలు.. జబ్బుపడ్డ తల్లిదండ్రులు.. ఒక్కమాటలో చెప్పాలంటే 80వ దశకంలో వచ్చిన తెలుగు సినిమాల్లోని హీరో కష్టాలనుకో’ అంటూ చెబుతూ పోయాడు.
భాస్కర్‌ ఇబ్బందులను దగ్గరుండి గమనించానన్న శరత్‌ ఇంకా చెబుతూ.. ‘డబ్బు అవసరం ఉందని తెలుసుకొన్నా! దీంతో బలి విషయం చెప్పకుండా.. లింగమార్పిడి చేసుకొంటే ఎంత కావాలంటే అంత డబ్బు ఇస్తానని ఆఫర్‌ చేశా. అయితే, మనోడు అప్పటికే ప్రేమలో పడ్డాడట. అన్నీ కుదరడంతో పెండ్లి కూడా చేసుకోబోతున్నాడట. ‘అన్నీ కుదిరాయా?? అదెలా?’ అని నేను ఆశ్చర్యంగా అడిగా. ‘నీకు చెప్పాల్సిన అవసరం లేదు’ అంటూ మొండిగా వెళ్లబోయాడు. చేతికొచ్చిన అవకాశం చేజారిపోతుందేమోనని వెనుక నుంచి భాస్కర్‌ తలపై కర్రతో ఒక్కటి ఇచ్చా. అంతే స్పృహ కోల్పోయాడు’ అంటూ ఊపిరిపీల్చుకొన్నాడు.
తాను చేసింది ఏదో గొప్ప పని అన్నట్టు శరత్‌ గర్వంతో చెప్తూపోతుండటంపై రుద్ర, స్నేహిల్‌, జయ, రామస్వామి తదితరులు అతని వంక అసహ్యంగా చూడసాగారు. అదేమీ పట్టించుకోని శరత్‌ మళ్లీ కొనసాగించాడు. ‘స్పృహ కోల్పోయిన భాస్కర్‌కు లింగమార్పిడి చేయించా. యాగానికి అవసరమైనట్టు మార్చేశా’ అంటూ సన్నగా నవ్వాడు. ‘అంటే, తను పెండ్లి చేసుకోబోతున్న అమ్మాయి కడుపు పండించలేనన్న బాధతోనే భాస్కర్‌ సూసైడ్‌ చేసుకొన్నాడా?’ అంటూ స్నేహిల్‌ ఏదో చెప్తూ పోతుండగా.. ‘అవును.. హాఫ్‌ నాలెడ్జ్‌ మై ఫ్రెండ్‌. అందుకేగా.. ఆ భాస్కర్‌ స్పృహలోకి రాగానే.. ఓరి భాస్కరా? ఎంత పని అయ్యెరా?? లగ్గానికి ముహూర్తం పెట్టుకొని.. నీ పిల్ల కోసం ఎదురుచూస్తున్న నీకు.. గిట్లయిపాయేమిరా?? ఇక, పైండ్లె నీ మనసు నిండినా.. ఆ పిల్ల కడుపు పండదురా.. అంటూ నేను చెప్పింది’ అని శరత్‌ మరోసారి నవ్వుతుండగానే.. పక్కనున్న రామస్వామి శరత్‌ చంప ఛెల్లుమనిపించాడు. ‘క్షమించండి రుద్ర బాబు. ఒక పోలీసు అయ్యి ఉండి వీడు ఇంతకంటే దిగజారడు.. అనుకొన్న ప్రతీసారి మరింత దిగజారుతున్నాడు. అందుకే, కొట్టాల్సొచ్చింది’ అంటూ రామస్వామి మండిపడ్డాడు. ‘హలో.. రామస్వామి బాబాయ్‌.. నువ్వు కూడా సినిమా డైలాగులు బాగానే కొడుతున్నావ్‌. అయినా.. ఒకరి తర్వాత ఒకరు నన్ను బాగానే వేస్కొంటున్నారు గానీ, ఇప్పటికైనా మీ డెకరేషన్‌ ఆపండి. ముందు.. ఆ కాంచనను కాపాడుకోండి’ అంటూ నోటితో సన్నగా ఈల వేశాడు శరత్‌. ‘కాంచననా??’ అంటూ అందరూ ఒకరి ముఖాలు ఒకరు చూసుకొన్నారు.
‘మీ సీరియల్‌ యాక్టింగ్‌ ఎక్స్‌ప్రెషన్స్‌ ఆపితే.. ఆ కాంచన ఎవరో చెప్తా’ అన్నాడు శరత్‌. అందరూ శరత్‌ వైపు తిరగ్గానే.. నేను ఆ డీటెయిల్స్‌ చెప్పాలంటే.. ముందు నేను అడిగే ఈ ప్రశ్నలకు సమాధానాలు ఇవ్వాలని మళ్లీ మెలిక పెట్టాడు. దీంతో చేసేదేమీ లేక.. క్వశ్చన్లు అడగమంటూ ఆవేదనతో కూడిన ఆగ్రహంతో అన్నాడు రుద్ర. తన గేమ్‌ను స్టార్ట్‌ చేశాడు శరత్‌. ‘మొదటి ప్రశ్న: నాకు ప్రాణంలేదు అయితే, పెరుగుతా. ఊపిరితిత్తులు లేకున్నా ఊపిరి పీలుస్తా. నోరు లేకపోయినా.. నీళ్లు తాగుతా. అయితే, నీటిని తాగినవెంటనే చస్తా.. నేనవర్నీ?? యువర్‌ టైమ్‌ స్టార్ట్స్‌ నౌ.. వన్‌, టూ..’ రుద్ర సమాధానం చెప్పాడు. రెండో ప్రశ్న: వట్టి చేతులతో వస్తా.. ఎన్నెన్నో నింపుకొని వెళ్తా? నేనెవరు?? యువర్‌ టైమ్‌ స్టార్ట్స్‌ నౌ.. వన్‌..’ రుద్ర సమాధానం చెప్పాడు. మూడో ప్రశ్న: ఒక డాక్టర్‌ పేషెంట్‌కు మూడు మందు బిళ్లలు ఇచ్చాడు. అరగంటకు ఒకటి చొప్పున మూడింటిని వేసుకోవాలన్నాడు. అన్ని బిళ్లలు వేసుకోవడానికి పేషెంట్‌కు ఎంత సమయం పడుతుంది? యువర్‌ టైమ్‌ స్టార్ట్స్‌ నౌ.. వన్‌, టూ, త్రీ..’ రుద్ర సమాధానం చెప్పాడు. నాలుగో ప్రశ్న: ఇంగ్లిష్‌ పదం అది. ‘e’తో మొదలై, మళ్లీ ‘e’తో ‘ముగుస్తుంది. అయితే, దాని మధ్యలో ఒకటే Letter ఉంటుంది. ఏంటది? యువర్‌ టైమ్‌ స్టార్ట్స్‌ నౌ.. వన్‌, టూ..’ రుద్ర సమాధానం చెప్పాడు. ఐదో ప్రశ్న: 10 అంతస్తుల భవనం మీద నుంచి కిందనున్న ఒక బండరాయి మీదకు అప్పుడే పొదిగిన కోడిగుడ్డును గట్టిగా విసిరేశా? అంత గట్టిగా గుడ్డు విసిరేసినా అది పగలలేదు. ఎందుకు? యువర్‌ టైమ్‌ స్టార్ట్స్‌ నౌ.. వన్‌, టూ, త్రీ..’ రుద్ర సమాధానం చెప్పాడు. తాను అడిగిన అన్ని ప్రశ్నలకు రుద్ర కరెక్ట్‌గా సమాధానాలు ఇవ్వడంతో కాంచన స్టోరీని చెప్పడం ప్రారంభించాడు శరత్‌. అది పక్కనబెడితే, రుద్ర చెప్పిన సమాధానాలను మీరు కనిపెట్టారా??
సమాధానాలు: 1. సమాధానం: మంట, 2. సమాధానం: రోజు, 3. సమాధానం: గంట, 4. సమాధానం: Envelope, 5. సమాధానం: ఇక్కడ ‘అది’ అంటే గుడ్డు కాదు. బండ
