Aesthetic Tea Cups | బొమ్మలాటలో చిన్నచిన్న పింగాణీ టీ సెట్లు చూస్తూనే ఉంటాం. అది పాత విషయమే. నిజమైన టీ సెట్లను బొమ్మల్లా పేర్చడమే కొత్త ట్రెండ్. అవును, మనం సాధారణంగా వాడుకునే పింగాణీ టీ సెట్లను పిల్లిలా, కుందేలులా, జీబ్రాలా, జిరాఫీలా.. ఇలా రకరకాల బొమ్మల్లా అమర్చుకోవచ్చు. వంటింటికి కొత్త అందాన్ని తెచ్చిపెట్టుకోవచ్చు.
ఇంటిని శుభ్రంగా పెట్టుకుంటే ఇల్లు బాగున్నట్టే అనుకునేవారు ఒకప్పుడు. కానీ అందంగానూ పెట్టుకుంటేనే ఇల్లు బాగుంటుందని అనుకుంటున్నారు ఇప్పుడు. ‘ఈస్తటిక్ సెన్స్ ( Aesthetic Sense )‘ పేరిట ఇంటీరియర్ డిజైనింగ్ మొదలు ఇంట్లో వాడే గిన్నెలూ చెంచాల దాకా అన్నీ అందంగా కనిపించాలి, అలంకరించినట్టే అనిపించాలి అంటున్నారు. ఇదే ఇప్పటి ట్రెండ్. ఆ ట్రెండ్కు తగ్గట్టే, వంటింటి పాత్రలనూ చూడముచ్చటగా ముస్తాబు చేస్తున్నారు డిజైనర్లు. అలా పుట్టుకొచ్చినవే ఇక్కడ కనిపిస్తున్న టీ సెట్లు. ఈ సెట్లలో కప్పులు, టీ కెటిల్, పంచదార డబ్బా.. అన్నీ కలిసి ఉంటాయి. వాటిని ఒక క్రమంలో పేరిస్తే మనం ఎంచుకున్న దాన్ని బట్టి ఏనుగు, కోతి, కుందేలు, పాపాయి.. ఇలా రకరకాల బొమ్మలు తయారవుతాయన్నమాట.
సెట్టును బట్టి ఒక కప్పు లేదా రెండు కప్పులు ఇందులో ఉంటాయి. దాదాపు అన్నింటిలోనూ ఉండేవి.. పంచదార డబ్బా, టీ కెటిల్. కావాలనుకున్నప్పుడు వీటిని విడదీసి వాడుకోవచ్చు. సాధారణ పింగాణీ పాత్రల్లానే చక్కగా ఉపయోగడతాయి. వాడుకోనప్పుడు డైనింగ్ టేబుల్ మీద అలంకరణకు పెట్టుకోవచ్చు. అమెజాన్తో పాటు వివిధ ఆన్లైన్ దుకాణాల్లో ‘యానిమల్ అసెంబుల్ మల్టీ ఫంక్షనల్ టీ పాట్ సెట్’లాంటి పేర్లతో అమ్ముతున్నారు. వీటిని కానుకగా ఇస్తే అందుకున్న వాళ్లు ఆనందంతో పాటు ఆశ్చర్యానికీ గురవుతారు. ఆలస్యమెందుకు, మీరూ ఆర్డర్ పెట్టేయండి మరి!
“LED Curtain Lights | కర్టెన్స్ను ఇకపై ఇలా మెరిపించండి”