ఏవీఎమ్‌ సిస్టర్స్‌

చెన్నైలోని ఏవీఎమ్‌ స్టూడియో గురించి తెలియనివారు ఉండరు. అనేక తెలుగు సినిమాలు అక్కడ రూపుదిద్దుకున్నాయి.

చెన్నైలోని ఏవీఎమ్‌ స్టూడియో గురించి తెలియనివారు ఉండరు. అనేక తెలుగు సినిమాలు అక్కడ రూపుదిద్దుకున్నాయి. ఏవీ మయ్యప్పన్‌ అనే సినిమా ప్రేమికుడు ఏడున్నర దశాబ్దాల క్రితం ఈ ఆవరణకు ప్రాణం పోశాడు. పెద్దాయనకు ఫిల్టర్‌ కాఫీ అంటే ఎంతిష్టమో, స్టూడియో అన్నా అంత ప్రాణం. ప్రస్తుతం ఆయన మునిముని మనవరాళ్లు అపర్ణ, అరుణా గుహ ఏవీఎమ్‌ స్టూడియోను నిర్వహిస్తున్నారు. నాలుగు తరాల వారసత్వ విలువలను కాపాడుకుంటూనే డిజిటల్‌ వినోద రంగంలోకి కూడా ప్రవేశించారు.

స్టూడియో మూలమూలనా కనిపించే పాత కెమెరాలు, రీళ్లు, లైటింగ్‌ ఎక్విప్‌మెంట్‌, ప్రొజెక్టర్లు చూసినప్పుడు ఆ అక్కాచెల్లెళ్లకు ఓ ఆలోచన వచ్చింది. వాటన్నిటినీ ఓ చోట పేర్చి.. మ్యూజియం ఏర్పాటు చేయాలనుకున్నారు. ప్రతి పరికరం ఓ చారిత్రక మలుపునకు సాక్ష్యమే. దుమ్ము, ధూళి ఇబ్బంది పెడుతున్నా ఆ పాత సామాన్లను ముందేసుకుని కూర్చున్నారు. ఏయే సినిమాలకు వాడారన్నదీ పాత రికార్డులు వెతికి కనిపెట్టారు. మొత్తానికి అనుకున్నది సాధించారు. మ్యూజియం సిద్ధం చేశారు. ‘ఏవీఎమ్‌ను నవతరానికి పరిచయం చేయాల్సిన బాధ్యత కూడా మా మీద ఉంది’ అని చెబుతారు అరుణ, అపర్ణ.