మందుకు బానిసనై 26 రోజులు పునరావాస కేంద్రంలో ఉన్నా

టీమిండియా స్టార్‌ లెగ్‌ స్పిన్నర్‌ యుజ్వేంద్ర చాహల్‌ తన వ్యక్తిగత జీవితానికి సంబంధించి సంచలన విషయాలను వెల్లడించాడు. 36 ఏండ్ల చాహల్‌ తాను మద్యానికి బానిసైనట్లు ఓ పాడ్‌కాస్ట్‌లో అంగీకరించాడు.

న్యూఢిల్లీ : టీమిండియా స్టార్‌ లెగ్‌ స్పిన్నర్‌ యుజ్వేంద్ర చాహల్‌ తన వ్యక్తిగత జీవితానికి సంబంధించి సంచలన విషయాలను వెల్లడించాడు. 36 ఏండ్ల చాహల్‌ తాను మద్యానికి బానిసైనట్లు ఓ పాడ్‌కాస్ట్‌లో అంగీకరించాడు. మితిమీరిన తాగుడుతో పరిస్థితి చేయి దాటిపోవడంతో పునరావాస కేంద్రంలో 26 రోజులు గడపాల్సి వచ్చిందని మాజీ ఓపెనర్‌ ఆకాశ్‌ చోప్రా నిర్వహించిన పాడ్‌కాస్ట్‌లో చాహల్‌ తెలిపాడు. ‘గతేడాది కౌంటీ క్రికెట్‌ ముగిసిన తర్వాత పరిస్థితి హద్దులు దాటింది. దాంతో నేను రిహాబ్‌ సెంటర్‌కు వెళ్లి అక్కడ 26 రోజులు ఉన్నాను. ఆ నిర్ణయం నా వ్యక్తిగత జీవితంలో పెనుమార్పు తెచ్చింది.

ఇప్పుడు నా భావోద్వేగాలను అదుపులో ఉంచుకోగలుగుతున్నాను’ అని తెలిపాడు. 2011లో ఐపీఎల్‌ కెరీర్‌ ప్రారంభమైనప్పుడు అలవాటైన మద్యపాన వ్యసనం భార్య ధనశ్రీతో విడాకుల తర్వాత హద్దులు దాటిందని, దాంతో తన మానసిక పరిస్థితి క్షీణించిందని చాహల్‌ చెప్పాడు. ‘ఆ సమయంలో నాలో తీవ్రమైన ఆందోళన, పానిక్‌ అటాక్స్‌ ప్రారంభమయ్యాయి. గుండె వేగంగా కొట్టుకోవడం, పానిక్‌ అటాక్‌ వచ్చినప్పుడు కనీసం మాట్లాడలేని పరిస్థితి.. పెదాలు బిగుసుకుపోయి ఒకవైపునకు లాగేసేవి. అప్పుడు నాలో ఏదో తేడా ఉందని అందరికీ అర్థమయ్యేది‘ అంటూ ఆ కష్టకాలం గురించి వివరించాడు.