Haryana | హర్యానా క్రీడల మంత్రి సందీప్ సింగ్ లైంగిక వేధింపులకు పాల్పడుతున్నట్లు ఆ రాష్ట్రానికి చెందిన జూనియర్ అథ్లెటిక్స్ కోచ్ ఇటీవల ఆరోపణలు చేసిన విషయం తెలిసిందే. ఈ విషయమై తాజాగా మరోసారి ఆమె సంచలన ఆరోపణలు చేశారు. తాను దేశాన్ని విడిచిపెట్టి వెళ్తే రూ.కోటి ఇస్తామంటూ ఫోన్ కాల్స్ వస్తున్నాయని పేర్కొన్నారు. రాష్ట్ర ముఖ్యమంత్రి మనోహర్ లాల్ ఖట్టర్ కేసును ప్రభావితం చేసేందుకు ప్రయత్నిస్తున్నారని ఆరోపించారు. చండీఘడ్ పోలీసు ప్రత్యేక దర్యాప్తు బృందం (సిట్) ఎదుట హాజరైన అనంతరం ఓ మీడియా సంస్థతో మాట్లాడుతూ ఆమె ఈ ఆరోపణలు చేశారు.
‘‘సిట్’కు నేను అన్ని విషయాలు వివరంగా చెప్పాను. పెండింగ్ సమస్యల గురించి కూడా సిట్ అధికారుల దృష్టికి తీసుకెళ్లాను. ముఖ్యమంత్రి ప్రకటన విని చాలా బాధపడ్డా. ఆయన కూడా సందీప్ సింగ్ వైపే ఉన్నట్టు అర్థమైంది. చండీఘడ్ పోలీసులు నాపై ఎలాంటి ఒత్తిడి తీసుకురాలేదు. హర్యానా పోలీసులు మాత్రం ఒత్తిడి తెస్తున్నారు’ అంటూ ఆవేదన వ్యక్తం చేశారు. ‘భారత్ వీడి ఇతర దేశాలకు వెళ్తే.. నెలకు రూ.కోటి ఇస్తామంటూ ఫోన్ కాల్స్ వస్తున్నాయి’ అని ఆమె ఆరోపించారు.