Visit:
Abhishek Nair : భారత పురుషుల జట్టు మాజీ సహాయక కోచ్ అభిషేక్ నాయర్ (Abhishek Nair) మళ్లీ బిజీ అయ్యాడు. ఇండియన్ ప్రీమియర్ లీగ్‌లో కోల్‌కతా నైట్ రైడర్స్ మూడో టైటిల్ విజయంలో కీలక పాత్ర పోషించిన నాయర్.. ఈసారి అమ్మాయిలకు శిక్షణ ఇవ్వనున్నాడు. మహిళల ప్రీమియర్ లీగ్ (WPL) ఫ్రాంచైజీ యూపీ వారియర్స్ (UP Warriorz) జట్టుకు హెడ్‌కోచ్‌గా నాయర్ నియమితులయ్యాడు. ఆ జట్టుకు మూడు సీజన్లు కోచింగ్ ఇచ్చిన జాన్ లెవిస్ (John Lewis) స్థానంలో నాయర్‌ను తీసుకున్నట్టు శుక్రవారం యూపీ యాజమాన్యం ఎక్స్ వేదికగా వెల్లడించింది.
ఐపీఎల్‌లో కోల్‌కతాకు ఆపై భారత జట్టుకు అసిస్టెంట్ కోచ్‌గా సేవలందించిన నాయర్ తమ జట్టు టైటిల్ కలను సాకారం చేస్తాడని యూపీ యాజమాన్యం నమ్ముతోంది. ‘యూపీ వారియర్స్‌తో రెండేళ్ల క్రితం పని చేశాను. బెంగళూరు ఆ జట్లు ప్లేయర్లకు మెలకువలు చెప్పాను. కానీ, ఈసారి హెడ్‌కోచ్‌గా పెద్ద బాధ్యత అప్పగించారు. మహిళల క్రికెట్ అభివృద్ధికి డబ్ల్యూపీఎల్ చక్కని వేదిక. నాలుగో సీజన్‌లో యూపీ స్క్వాడ్‌ ప్రతిభావంతులతో నిండేలా చూస్తాను.
🚨 JUST IN: Abhishek Nayar has been named the new head coach of UP Warriorz ahead of #WPL2026 #wpl #abhisheknayar #upwarriorz pic.twitter.com/bWdnWum6Hk
— Cricbuzz (@cricbuzz) July 25, 2025
ఇప్పటికే ఆ జట్టు పటిష్టంగానే ఉంది’ అని నాయర్ వెల్లడించాడు. నిరుడు గౌతం గంభీర్‌ బృందంలో ఒకడిగా టీమిండియాకు అసిస్టెంట్ కోచ్‌గా ఎంపికైన నాయర్‌పై అనుకోకుండా వేటు పడింది. దాంతో.. అతడిని కోల్‌కతా రా రామ్మంటూ ఆహ్వానించింది. అయితే.. 18వ సీజన్‌లో డిఫెండింగ్ ఛాంపియన్‌గా బరిలోకి దిగిన కోల్‌కతా తీవ్రంగా నిరాశపరిచిన విషయం తెలిసిందే.
మహిళల ప్రీమియర్ లీగ్ తొలి సీజన్ నుంచి బరిలోకి దిగుతున్న ఐదు జట్లలో యూపీ వారియర్స్ ఒకటి. ఆరంభ ఎడిషన్‌లో కోచ్ జాన్ లెవిస్ మార్గనిర్దేశనంలో యూపీ ప్లే ఆఫ్స్ వరకూ వెళ్లింది. అయితే.. నాకౌట్ పోరు ముంబై ఇండియన్స్ చేతిలో ఓడి ఇంటిదారి పట్టింది. నిరుడు జరిగిన టోర్నీలో యూపీ మూడు విక్టరీలతో నాలుగో స్థానంలో నిలిచింది.
మొత్తంగా డబ్ల్యూపీఎల్‌లో ఆ జట్టు 25 మ్యాచుల్లో తొమ్మిదింట మాత్రమే గెలుపొందింది. ఈసారి మాత్రం ఛాంపియన్‌గా నిలిచేందుకు యూపీ పక్కాగా సిద్ధమవుతోంది. ఈ నేపథ్యంలోనే టాలెంట్ స్కౌట్‌గా, వ్యూహకర్తగా అనుభవమున్న అభిషేక్‌ను ప్రధాన కోచ్‌గా నియమించింది యూపీ మేనేజ్‌మెంట్.
