ఫుట్‌బాలర్‌ను లాక్కెళ్లిన మొసలి.. కాల్పులు జరిపితే కానీ మృతదేహాన్ని వదల్లేదు!

కొస్టారికా ఫుట్‌బాలర్‌ జీసస్‌ అల్బర్టో లోపెజ్‌ ఒర్టిజ్‌ మృతి క్రీడాభిమానులను కలిచి వేసింది. కానస్‌ నదిలో సరదాగా ఈతకు వెళ్లిన జీసస్‌ అల్బర్టోను భారీ మొసలి బలి తీసుకుంది. మొసలి నుంచి తప్పించుకునేందుకు జీసస్‌ అన్ని రకాలుగా ప్రయత్నించినా లాభం లేకపోయింది.

సాన్‌జోస్‌: కొస్టారికా ఫుట్‌బాలర్‌ జీసస్‌ అల్బర్టో లోపెజ్‌ ఒర్టిజ్‌ మృతి క్రీడాభిమానులను కలిచి వేసింది. కానస్‌ నదిలో సరదాగా ఈతకు వెళ్లిన జీసస్‌ అల్బర్టోను భారీ మొసలి బలి తీసుకుంది. మొసలి నుంచి తప్పించుకునేందుకు జీసస్‌ అన్ని రకాలుగా ప్రయత్నించినా లాభం లేకపోయింది. నోట కరుచుకుని జీసస్‌ ప్రాణాన్ని చిదిమేసిన రాకాసి మొసలి మృతదేహంతో నదిలో కలియతిరుగడం స్థానికులు గమనించారు.

ఎంతకు వదిలి పెట్టకపోవడంతో కాల్పులు జరిపిన స్థానికులు మృతదేహాన్ని ఒడ్డుకు చేర్చారు. ఇదంతా వీడియోలో రికార్డు అయ్యింది. గత నెల 29న జరిగిన ఈ దారుణ ఘటన ఆలస్యంగా వెలుగులోకి వచ్చింది. డేపోర్టివో రియో కనాస్‌ ఫుట్‌బాల్‌ క్లబ్‌ తరఫున ప్రాతినిధ్యం వహిస్తున్న 29 ఏండ్ల జీసస్‌కు భార్య, ఇద్దరు పిల్లలు ఉన్నారు. యువ ఫుట్‌బాలర్‌ మృతి పట్ల సాకర్‌ క్లబ్‌ తీవ్ర సంతాపం వ్యక్తం చేసింది. క్లిష్ట సమయంలో అతని కుటుంబానికి తామంత అండగా ఉంటామని పేర్కొంది.