న్యూఢిల్లీ: ఐఎస్ఎస్ఎఫ్ జూనియర్ షూటింగ్ ప్రపంచకప్లో తెలంగాణ యువ షూటర్ ఇషాసింగ్ అదరగొట్టింది. మిక్స్డ్ టీమ్ పిస్టల్ ఈవెంట్లో సౌరభ్ చౌదరితో జతకట్టిన ఇషా అద్భుత ప్రదర్శనతో 18వ అంతర్జాతీయ పతకాన్ని తన ఖాతాలో వేసుకుంది. జర్మనీ వేదికగా జరుగుతున్న షూటింగ్ మెగాటోర్నీలో భారత షూటర్లు ఆధిపత్యం ప్రదర్శిస్తున్నారు. గురువారం జరిగిన మిక్స్డ్ టీమ్ పిస్టల్ ఫైనల్లో ఇషా-సౌరభ్ జంట 16-12 తేడాతో భారత్కే చెందిన పాలక్-సరబ్జ్యోత్ జోడీని చిత్తు చేసింది. ఇషా-సౌరభ్ స్వర్ణం చేజిక్కించుకోగా.. పాలక్-సరబ్జ్యోత్ సింగ్ ద్వయం రజతం కైవసం చేసుకుంది. 10 మీటర్ల ఎయిర్ రైఫిల్ మిక్స్డ్ టీమ్లో రమిత-పార్త్ మఖిజా ద్వయం 13-17 తేడాతో పోలాండ్ జోడీ చేతిలో ఓడిపోయి రజతం సొంతం చేసుకుంది. ఈ మెగా టోర్నీలో భారత్ ఖాతాలో 10 పతకాలు చేరాయి. స్వర్ణం నెగ్గిన 17 ఏండ్ల ఇషా మొత్తంగా ఇప్పటి వరకు 26 జాతీయ పతకాలను తన ఖాతాలో వేసుకుని సత్తాచాటింది.