T20 World Cup | హ్యాట్రిక్ వికెట్లు తీసిన శ్రీలంక స్పిన్నర్‌ హసరంగ

T20 World Cup | శ్రీలంక రైజింగ్ స్టార్ వాసిందు హసరంగ అరుదైన రికార్డును తన పేరిట లిఖించుకున్నాడు. సౌతాఫ్రికాతో జరిగిన మ్యాచ్‌లో హ్యాట్రిక్‌ వికెట్లు తీశాడు.

షార్జా: శ్రీలంక రైజింగ్ స్టార్ వాసిందు హసరంగ అరుదైన రికార్డును తన పేరిట లిఖించుకున్నాడు. సౌతాఫ్రికాతో జరిగిన మ్యాచ్‌లో హ్యాట్రిక్‌ వికెట్లు తీశాడు. ఈ క్రమంలో టీ20 ప్రపంచకప్‌లో హ్యాట్రిక్ వికెట్లు తీసిన తొలి స్పిన్నర్‌గా రికార్డు నెలకొల్పాడు. దక్షిణాఫ్రికా బ్యాట్స్‌మెన్‌ ఎయిడెన్ మార్క్రమ్‌, టెంబా బవుమా, డ్వేన్ ప్రిటోరియస్‌ను వరుస బంతుల్లో అవుట్ చేసిన హసరంగ ఈ రికార్డు సాధించాడు.

అతని కన్నా ముందు ఇలా టీ20 ప్రపంచకప్‌లలో హ్యాట్రిక్‌ సాధించిన ఇద్దరూ కూడా పేసర్లే కావడం గమనార్హం. తొలి టీ20 ప్రపంచకప్‌లో బంగ్లాదేశ్‌తో జరిగిన మ్యాచ్‌లో ఆస్ట్రేలియా లెజెండ్‌ బ్రెట్‌లీ హ్యాట్రిక్ వికెట్లు తీశాడు. ప్రస్తుతం జరుగుతున్న ప్రపంచకప్‌లో నెదర్లాండ్స్‌తో జరిగిన మ్యాచ్‌లో ఐర్లాండ్ ఆటగాడు కర్టిస్‌ కాంఫర్ నాలుగు బంతుల్లో నాలుగు వికెట్లు తీశాడు. ఇప్పుడు హసరంగ మరో హ్యాట్రిక్‌ నమోదు చేశాడు.

అంటే ఈ ప్రపంచకప్‌లోనే రెండు హ్యాట్రిక్‌లు నమోదయ్యాయన్నమాట. అంతేకాదు ఆసీస్ పేసర్‌ బ్రెట్‌లీ వన్డే ప్రపంచకప్‌లో కూడా హ్యాట్రిక్ తీశాడు. 2003 ప్రపంచకప్‌లో కెన్యాపై ఈ ఫీట్ సాధించాడు. ఇలా టీ20, వన్డే ప్రపంచకప్‌లు రెండింట్లోనూ హ్యాట్రిక్‌లు రికార్డు చేసిన ఏకైక బౌలర్ అతనే.