హైదరాబాద్, ఆట ప్రతినిధి: రాష్ట్ర అభివృద్ధి కోసం నిరంతరం శ్రమిస్తున్న మంత్రి కేటీఆర్ పుట్టిన రోజు సందర్భంగా క్రీడా పోటీలను ఘనంగా నిర్వహించేందుకు స్పోర్ట్స్ అసోసియేషన్లు ముందుకురావడం హర్షణీయమని సాట్స్ చైర్మన్ ఆంజనేయగౌడ్ అన్నారు. ఈ నెల 24న ఐటీ, పురపాలక శాఖ మంత్రి కేటీఆర్ పుట్టినరోజు పురస్కరించుకుని క్రీడా సంఘాలు..సాట్స్ సమన్వయంతో రాష్ట్ర స్థాయి సైక్లింగ్, స్కేటింగ్, రెజ్లింగ్(మహిళలు) పోటీలు జరిపేందుకు సిద్ధమయ్యాయి.
ఆయా సంఘాల ప్రతినిధులు..సాట్స్ చైర్మన్ను కలిసి సహకారం అందించాలని కోరారు. ఈ సందర్భంగా ఆంజనేయగౌడ్ మాట్లాడుతూ ‘క్రీడా ప్రేమికుడైన మంత్రి కేటీఆర్ పుట్టిన రోజు సందర్భంగా పోటీలు నిర్వహించడం సంతోషం. టోర్నీ నిర్వహణకు సాట్స్ అన్ని రకాలుగా మద్దతుగా ఉంటుంది. మంత్రి శ్రీనివాస్గౌడ్ సహకారంతో క్రీడా సంఘాలకు పూర్తి సహకారం అందిస్తాం’ అని అన్నారు. ఈ కార్యక్రమంలో రెజ్లింగ్, స్కేటింగ్, సైక్లింగ్ ప్రతినిధులు పాల్గొన్నారు.