మ్యాచ్ జ‌రుగుతుండ‌గా స్టేడియంలోకి పారాచూట్‌తో నిర‌స‌న‌కారుడు.. ఫ్యాన్స్‌కు గాయాలు

మ్యూనిక్‌: ఓ నిర‌స‌నకారుడు త‌న నిర‌స‌న‌ను వినూత్నంగా చెప్పాల‌ని అనుకున్నాడు. కానీ అది కాస్తా చివ‌రికి హింసాత్మ‌కంగా మారింది. ప‌లువురు అభిమానులు గాయ‌ప‌డి, హాస్పిట‌ల్‌లో చికిత్స తీసుకోవాల్సిన ప‌రిస్థితి వ‌చ్చింది. మంగ‌ళ‌వారం యూరోక‌ప్‌లో భాగంగా జ‌ర్మ‌నీ, ఫ్రాన్స్ మ‌ధ్య జ‌రిగిన మ్యాచ్‌లో ఈ ఘ‌టన జ‌రిగింది. పారాచూట్‌తో ఆ నిర‌స‌న‌కారుడు స్టేడియంలోకి రాగానే అక్క‌డి ఓవ‌ర్‌హెడ్ కెమెరా వైర్ల‌కు అది త‌గిలి అదుపు త‌ప్పింది. దీంతో స్టేడియం పైక‌ప్పు కాస్త దెబ్బ‌తిని ఆ ముక్క‌లు అభిమానుల‌పై ప‌డ్డాయి. తృటిలో ఫ్రాన్స్ కోచ్ దిదియ‌ర్ డెశ్చాంప్స్ త‌ప్పించుకున్నాడు.

ఈ ఘ‌ట‌న‌ను యురోపియ‌న్ సాక‌ర్ తీవ్రంగా ప‌రిగ‌ణించింది. స‌ద‌రు నిర‌స‌న‌కారుడిపై క‌ఠిన చ‌ర్య‌లు తీసుకుంటామ‌ని చెప్పింది. ఆయిల్ వాడ‌కాన్ని ఆపేయండి అంటూ ఆ నిర‌స‌న‌కారుడు నినాదాలు చేశాడు. పార‌చూట్‌పై గ్రీన్‌పీస్ అని రాసి ఉంది. ఆ నిర‌స‌న‌కారుడు గ్రౌండ్‌లో దిగ‌గానే జ‌ర్మ‌నీ ప్లేయ‌ర్స్ ఆంటోనియో రైగ‌ర్‌, రాబిన్ గోసెన్స్ అత‌ని ద‌గ్గ‌రికి వెళ్లారు. వెంట‌నే సెక్యూరిటీ సిబ్బంది అత‌న్ని బ‌య‌ట‌కు తీసుకెళ్లారు. ఈ యూరోక‌ప్ స్పాన్స‌ర్‌గా ఉన్న ర‌ష్యాకు చెందిన ఇంధ‌న ఉత్ప‌త్తి సంస్థ గాజ్‌ప్రోమ్‌కు వ్య‌తిరేకంగా గ‌తంలోనూ గ్రీన్‌పీస్ నిర‌స‌న‌లు తెలిపింది.

https://twitter.com/FutbolBible/status/1404882413524713475?s=20