SA vs AFG: పోరాడి ఓడిన అఫ్గానిస్తాన్.. స్వల్ప లక్ష్యాన్ని ఛేదించేందుకు తంటాలు పడ్డ సఫారీలు

SA vs AFG: ఇంగ్లండ్, పాకిస్తాన్‌ వంటి టాప్‌  టీమ్స్‌కు షాకిచ్చి ఆస్ట్రేలియాను  ఓడించినంత పనిచేసిన అఫ్గాన్‌.. శుక్రవారం సౌతాఫ్రికాతో జరిగిన మ్యాచ్‌లో బ్యాటింగ్‌లో విఫలమైనా బౌలింగ్‌లో తమ సత్తా చాటి  సఫారీలను కంగారుపెట్టింది.

SA vs AFG: వన్డే వరల్డ్‌ కప్‌లో సంచలన విజయాలతో  సెమీస్‌ రేసులో  అగ్రశ్రేణి జట్లకు షాకిచ్చిన అఫ్గానిస్తాన్‌  కథ ముగిసింది.  ఇంగ్లండ్, పాకిస్తాన్‌ వంటి టాప్‌  టీమ్స్‌కు షాకిచ్చి ఆస్ట్రేలియాను  ఓడించినంత పనిచేసిన అఫ్గాన్‌.. శుక్రవారం సౌతాఫ్రికాతో జరిగిన మ్యాచ్‌లో బ్యాటింగ్‌లో విఫలమైనా బౌలింగ్‌లో తమ సత్తా చాటి  సఫారీలను కంగారుపెట్టింది. ఓటమితో ప్రయాణాన్ని ముగించినా   విజయం కోసం తుదికంటా పోరాడింది.  శుక్రవారం అహ్మదాబాద్‌ వేదికగా   దక్షిణాఫ్రికాతో జరిగిన మ్యాచ్‌లో  అఫ్గానిస్తాన్‌ నిర్దేశించిన 245 పరుగుల లక్ష్యాన్ని  సఫారీలు.. 47.3  ఓవర్లలో 5 వికెట్లు కోల్పోయి ఛేదించారు. స్వల్ప లక్ష్యాన్ని ఛేదించే క్రమంలో  ఆ జట్టు ఎప్పటిలాగే ఛేదనలో తడబడినా రస్సీ వాండెర్‌ డసెన్‌ (95 బంతుల్లో 76 నాటౌట్‌, 6 ఫోర్లు, 1 సిక్స్‌), ఆండిల్‌ పెహ్లుక్వాయో (37 బంతుల్లో 39 నాటౌట్‌, 1 ఫోర్‌, 3 సిక్సర్లు)లు తుదికంటా నిలబడి  సౌతాఫ్రికాను విజయతీరాలకు చేర్చారు.

మోస్తారు లక్ష్య ఛేదనలో సఫారీలకు శుభారంభమే దక్కింది.  దక్షిణాఫ్రికా ఓపెనర్లు  క్వింటన్‌ డికాక్‌ (47 బంతుల్లో 41, 2 ఫోర్లు, 3 సిక్సర్లు),  టెంబా బవుమా (28 బంతుల్లో 23, 3 ఫోర్లు)  తొలి వికెట్‌కు  11 ఓవర్లలో  64 పరుగులు జోడించారు. కానీ రెండు పరుగుల వ్యవధిలోనే ఈ ఇద్దరూ నిష్క్రమించారు.  వన్‌ డౌన్‌లో వచ్చిన  డసెన్‌.. ఎయిడెన్‌ మార్క్‌రమ్‌ (32 బంతుల్లో  25, 1 ఫోర్‌, 1 సిక్స్‌)తో కలిసి  మూడో వికెట్‌కు  50 పరుగులు జోడించాడు.  అయితే  రషీద్‌ ఖాన్‌ మాయతో మార్క్‌రమ్‌తో పాటు హెన్రిచ్‌ క్లాసెన్‌ (13 బంతుల్లో 10, 1 ఫోర్‌) పనిపట్టాడు.  డేవిడ్‌ మిల్లర్‌ (33 బంతుల్లో 24, 1 ఫోర్‌, 1 సిక్స్)   కూడా ఎక్కువసేపు క్రీజులో నిలవలేదు.

182 పరుగులకు  ఐదు వికెట్లు కోల్పోయిన దశలో మరో రెండు వికెట్లు పడగొడితే  పరిస్థితి ఎలా ఉండేదో గానీ డసెన్‌, పెహ్లుక్వాయో మాత్రం అఫ్గాన్‌లకు ఆ ఛాన్స్‌ ఇవ్వలేదు.  ధాటిగా ఆడే సఫారీలను అఫ్గాన్‌ స్పిన్నర్లు కట్టడిచేసినా   కీలక సమయంలో వికెట్లు తీయలేక చతికిలపడ్డారు. స్వల్ప లక్ష్యాన్ని ఛేదించేందుకు  సఫారీలు.. 47.3 ఓవర్లు ఆగాల్సి వచ్చిందంటే అఫ్గాన్‌ బౌలర్లు వారిని ఎంత కట్టడి చేశారో అర్థం చేసుకోవచ్చు. ఆఖర్లో  18 బంతుల్లో 14 పరుగులు చేయాల్సి ఉండగా నవీన్‌ ఉల్‌ హక్‌ వేసిన 48వ ఓవర్లో పెహ్లుక్వాయో.. 6, 4, 6 బాది   సఫారీలకు విజయాన్ని అందించాడు.

 

𝐀𝐟𝐠𝐡𝐚𝐧𝐀𝐭𝐚𝐥𝐚𝐧, 𝐓𝐡𝐞 𝐏𝐫𝐢𝐝𝐞 𝐨𝐟 𝐀𝐟𝐠𝐡𝐚𝐧𝐢𝐬𝐭𝐚𝐧 🤩#AfghanAtalan | #NewCoverPhoto | #CWC23 | #WarzaMaidanGata pic.twitter.com/TmQNrMETUh

— Afghanistan Cricket Board (@ACBofficials) November 10, 2023