Rafael Nadal : మాజీ వరల్డ్ నంబర్ 1 రఫెల్ నాదల్(Rafael Nadal)కు గడ్డుకాలం నడుస్తోంది. తొడ కండరాల(Hip injury) గాయం నుంచి పూర్తిగా కోలుకోని అతడికి మరొక షాక్ తగిలింది. పురుషుల టెన్నిస్ ర్యాంకింగ్స్లో అతను టాప్ -100లో కూడా లేడు. నాదల్ ప్రస్తుతం 136వ ర్యాంక్కు పడిపోయాడు. ఇంత తక్కువ ర్యాంక్ తెచ్చుకోవడం అతడి 20 ఏళ్ల కెరీర్లో ఇదే మొదటిసారి.
ఈ ఏడాది ఆరంభంలో ఆస్ట్రేలియన్ ఓపెన్(Australian 0pen )లో రఫా గాయపడ్డాడు. దాంతో, అతను ఆ టోర్నీలో రెండో రౌండ్లోనే ఇంటిదారి పట్టాడు. అప్పటి నుంచి ఆటకు దూరంగా ఉంటున్నాడు. ఈ మధ్యే సర్జరీ చేయించుకున్న అతను రాకెట్ పట్టేందుకు మరో ఐదు నెలల పట్టనుంది. అందుకని నాదల్ తనకెంతో ఇష్టమైన ఫ్రెంచ్ ఓపెన్ నుంచి వైదొలిగాడు. టెన్నిస్ దిగ్గజాల్లో ఒకడైన అతడి ఖాతాలో ప్రస్తుతం 22 గ్రాండ్స్లామ్ టైటిళ్లు ఉన్నాయి.
ఫ్రెంచ్ ఓపెన్ ట్రోఫీతో జకోవిచ్
జనవరిలో సెర్బియా స్టార్ నొవాక్ జకోవిచ్(Novak Djokovic) ఆస్ట్రేలియన్ ఓపెన్లో విజేతగా నిలిచాడు. దాంతో, 22వ గ్రాండ్స్లామ్ టైటిళ్లతో నాదల్ రికార్డు సమం చేశాడు. రెండు రోజుల క్రితం ఫ్రెంచ్ ఓపెన్ టైటిల్ గెలిచి టెన్నిస్లో సరికొత్త రికార్డు సృష్టించాడు. అత్యధికంగా 23 గ్రాండ్స్లామ్స్ గెలిచిన తొలి ఆటగాడిగా చరిత్రకెక్కాడు. మాజీ ఆటగాడు రోజర్ ఫెదరర్ 20 గ్రాండ్స్లామ్స్తో మూడో స్థానంలో ఉన్నాడు.