యురోపియ‌న్ ఫుట్‌బాల్‌లో ప్ర‌కంప‌న‌లు‌.. కొత్త లీగ్‌కు సై అన్న ఆరు క్ల‌బ్‌లు

April 19, 2021 / 04:52 PM IST

లండ‌న్‌: ఫుట్‌బాల్‌లో ఓ రెబ‌ల్ లీగ్ ప్రారంభం కాబోతోంది. దాని పేరు యురోపియ‌న్ సూప‌ర్ లీగ్ (ఈఎస్ఎల్‌). యురోపియ‌న్ ఫుట్‌బాల్‌లో ప్ర‌కంప‌న‌లు సృష్టిస్తూ.. ఆరు ప్ర‌ధాన క్ల‌బ్‌లు ఈ సూపర్ లీగ్‌కు సై అన‌డం ఫిఫా, యూఈఎఫ్ఏల‌కు మింగుడు ప‌డ‌టం లేదు. ఆర్సెనెల్‌, చెల్సీ, లివ‌ర్‌పూల్, మాంచెస్ట‌ర్ సిటీ, మాంచెస్ట‌ర్ యునైటెడ్‌, టోటెన్‌హామ్ క్ల‌బ్‌లు ఈ యురోపియ‌న్ సూప‌ర్ లీగ్‌లో ఆడేందుకు సిద్ధ‌మ‌ని ప్ర‌క‌టించాయి.

ఇప్ప‌టికే దీనికి ఓకే చెప్పిన ఏసీ మిలాన్‌, అట్లెటికో మాడ్రిడ్‌, బార్సిలోనా, ఇంట‌ర్ మిలాన్‌, జువెంట‌స్‌, రియ‌ల్ మాడ్రిడ్ టీమ్స్‌తో ఇవి చేర‌నున్నాయి. దీంతో ఈ లీగ్‌లో టీమ్స్ సంఖ్య 12కు చేరంది. వీటికి తోడు మ‌రో మూడు టీమ్స్ కూడా ఆడ‌నున్న‌ట్లు నిర్వాహ‌కులు ప్ర‌క‌టించారు. ఈ 15 టీమ్స్ ప్ర‌తి ఏటా ఈ లీగ్‌లో త‌ల‌ప‌డ‌నుండగా.. మ‌రో ఐదు టీమ్స్ క్వాలిఫై అయి ఆడాల్సి ఉంటుంది.

ఈ టీమ్స్ త‌మ నేష‌న‌ల్ లీగ్స్‌లో ఆడుతూనే వారం మ‌ధ్య‌లో ఆడ‌టానికి సిద్ధ‌ప‌డిన‌ట్లు ఈఎస్ఎల్ వెల్ల‌డించింది. సాధ్య‌మైనంత త్వ‌ర‌గా ఈ లీగ్‌ను ప్రారంభించ‌నున్న‌ట్లు చెప్పింది. మ‌హిళ‌ల టోర్నీని కూడా ప్రారంభిస్తామ‌ని స్ప‌ష్టం చేసింది.

ఫిఫా హెచ్చ‌రిక‌లు

అయితే ఈ లీగ్‌ను బ్రిట‌న్ ప్ర‌ధాని బోరిస్ జాన్స‌న్‌తోపాటు ఫిఫా, యూఈఎఫ్ఏ, ప్రీమియ‌ర్ లీగ్‌లు తీవ్రంగా వ్య‌తిరేకిస్తున్నాయి. ఈ లీగ్ ముందుకు వెళ్ల‌కుండా ఏం చేయాలో అన్నీ చేస్తామ‌ని బ్రిట‌న్ ప్ర‌ధాని బోరిస్ జాన్స‌న్ చెప్ప‌డం గమ‌నార్హం. దేశంలోని ఫుట్‌బాల్ అభిమానులు, ఈ దేశ ఫుట్‌బాల్‌కు ఇది మంచి విష‌యం కాద‌ని ఆయ‌న అన్నారు. ఇది కేవ‌లం డ‌బ్బు కోస‌మే ఆడుతున్న లీగ్ అని, ఇది ఫుట్‌బాల్ స‌మ‌గ్ర‌త‌ను దెబ్బ తీస్తుంద‌ని విమ‌ర్శ‌కులు అంటున్నారు.

ఈ లీగ్‌ను తాము గుర్తించ‌బోమ‌ని ఫిఫా ఇప్ప‌టికే ప్ర‌క‌టించింది. ఇందులో ఆడే ప్లేయ‌ర్స్‌ను వ‌ర‌ల్డ్‌క‌ప్‌లో ఆడ‌నివ్వ‌మ‌నీ హెచ్చ‌రించింది. అటు యురోపియ‌న్ ఫుల్‌బాల్‌కు చెందిన‌ యూఈఎఫ్ఏ కూడా ఇందులో ఆడే ప్లేయ‌ర్స్ మ‌రెందులోనూ ఆడ‌కుండా నిషేధం విధిస్తామ‌ని స్ప‌ష్టం చేసింది. ఈ లీగ్ విష‌య‌మై అటు ఫిఫా, ఇటు ఈఎస్ఎల్ మ‌ధ్య న్యాయ పోరాటం కూడా జ‌రిగే అవ‌కాశం క‌నిపిస్తోంది.