NZ vs BAN | బంగ్లాపై కివీస్ ఘనవిజయం.. సిరీస్ సమం

NZ vs BAN | కివీ పేసర్ల ధాటికి బంగ్లా బ్యాటర్లు వణికిపోయారు. రెండు ఇన్నింగ్సులు బ్యాటింగ్ చేసి కూడా న్యూజిల్యాండ్ తొలి ఇన్నింగ్స్ స్కోరును సాధించలేకపోయారు. దీంతో బంగ్లాపై కివీస్ జట్టు ఇన్నింగ్స్ 117 పరుగుల

కివీ పేసర్ల ధాటికి బంగ్లా బ్యాటర్లు వణికిపోయారు. రెండు ఇన్నింగ్సులు బ్యాటింగ్ చేసి కూడా న్యూజిల్యాండ్ తొలి ఇన్నింగ్స్ స్కోరును సాధించలేకపోయారు. దీంతో బంగ్లాపై కివీస్ జట్టు ఇన్నింగ్స్ 117 పరుగుల తేడాతో ఘనవిజయం సాధించింది.

వరల్డ్ టెస్టు ఛాంపియన్ జట్టును తొలి టెస్టులో అనూహ్యంగా ఓడించిన బంగ్లా.. రెండో టెస్టులో పూర్తిగా చేతులెత్తేసింది. ఈ మ్యాచ్‌లో టాస్ గెలిచిన బంగ్లాదేశ్ బౌలింగ్ ఎంచుకుంది. కివీ కెప్టెన్ టామ్ లాథమ్ (252), డెవాన్ కాన్వే (109, విల్ యంగ్ (54), టామ్ బ్లండెల్ (57), రాస్ టేలర్ (28) రాణించడంతో న్యూజిల్యాండ్ జట్టు 521/6తో పటిష్టమైన స్థితిలో నిలిచింది.

ఈ సమయంలో కెప్టెన్ లాథమ్..ఇన్నింగ్స్ డిక్లేర్ చేశాడు. అనంతరం బ్యాటింగ్‌కు దిగిన బంగ్లాదేశ్.. ట్రెంట్ బౌల్ట్, కైల్ జేమీసన్, టిమ్ సౌథీ నిప్పులు చెరగడంతో బంగ్లా బ్యాటర్లు వణికిపోయారు. 126 పరుగులకే బంగ్లాదేశ్ చాపచుట్టేసింది. దీంతో ఫాలోఆన్‌లో పడిన బంగ్లా.. రెండో ఇన్నింగ్స్‌లో లిటాన్ దాస్ (102) పోరాడటంతో 278 పరుగులు చేసి ఆలౌట్ అయింది.

ఈ విజయంతో బంగ్లా-న్యూజిల్యాండ్ రెండు టెస్టుల సిరీస్ 1-1తో సమమైంది. ఈ టెస్టుతో కివీస్ సీనియర్ బ్యాటర్ రాస్ టేలర్ టెస్టు క్రికెట్‌కు గుడ్ బై చెప్పనున్నాడు. తన చివరి మ్యాచ్‌లో కనీసం హాఫ్ సెంచరీ కూడా చేయని టేలర్.. బౌలింగ్ చేసి బంగ్లా ఇన్నింగ్స్ చివరి వికెట్ తీశాడు.