నాదల్, స్వియాటెక్ ముందంజ
ఫ్రెంచ్ ఓపెన్ గ్రాండ్స్లామ్
పారిస్: ప్రతిష్ఠాత్మక ఫ్రెంచ్ ఓపెన్ గ్రాండ్స్లామ్లో ప్రపంచ మాజీ నంబర్వన్ నవోమి ఒసాకా (జపాన్)కు షాక్ తగిలింది. తొలి రౌండ్లో అమండా అనిసిమోవా (అమెరికా) చేతిలో ఒసాకా పరాజయం పాలవగా.. స్వియాటెక్, అజరెంక, స్పెయిన్ బుల్ రఫేల్ నాదల్ శుభారంభం చేశారు. మహిళల సింగిల్స్ తొలి రౌండ్లో ఒసాకా 5-7, 4-6తో అనిసిమోవా చేతిలో ఓడింది. ఆస్ట్రేలియన్ ఓపెన్లోనూ అనిసిమోవా చేతిలో ఒసాకా తొలి రౌండ్లోనే ఓటమి చెందిన విషయం తెలిసిందే. మరో పోరులో టాప్ సీడ్ ఇగా స్వియాటెక్ (పోలాండ్) 6-2, 6-0తో లెసియా సురెంకో (ఉక్రెయిన్)ను చిత్తు చేసింది.
సుదీర్ఘంగా సాగిన సమరంలో అజరెంకా బొడ్గాన్పై విజయం సాధించగా.. మరో మ్యాచ్లో డిఫెండింగ్ చాంపియన్ రెజ్సికోవా (చెక్ రిపబ్లిక్)కు ఎదురుదెబ్బ తగిలింది. 6-1, 2-6, 3-6తో 19 ఏండ్ల డియానె పారీ (ఫ్రాన్స్) చేతిలో ఓడిపోయింది. మొదటి సెట్ను కోల్పోయి అనంతరం గొప్పగా పుంజుకున్న ఫ్రెంచ్ ప్లేయర్ పారీ తనదైన ఆటతో రెజ్సికోవాను చిత్తుచేసి సంచలనం సృష్టించింది.
నాదల్ జోరు షురూ..
పురుషుల సింగిల్స్లో స్పెయిన్ బుల్ రఫేల్ నాదల్ తొలి పోరులో సునాయాస విజయం సాధించాడు. సోమవారం జరిగిన పోరులో ఐదో సీడ్ నాదల్ 6-2, 6-2, 6-2తో థామ్సన్ను చిత్తు చేశాడు. పూర్తి ఏకపక్షంగా సాగిన పోరులో నాదల్.. వరుస సెట్లలో విజృంభించాడు. ఒక ఏస్ సంధించిన నాదల్ 7 బ్రేక్ పాయింట్లు ఖతాలో వేసుకున్నాడు. ఇతర మ్యాచ్ల్లో దిమిత్రోవ్, కుబ్లెర్, కచనోవ్ ముందంజ వేశారు.