అజర్‌కు చుక్కెదురు

హైదరాబాద్‌ క్రికెట్‌ అసోసియేషన్‌(హెచ్‌సీఏ) ఎన్నికల్లో మాజీ అధ్యక్షుడు మహమ్మద్‌ అజారుద్దీన్‌కు చుక్కెదురైంది. అసోసియేషన్‌ ఎన్నికల్లో ఓటు హక్కు వినియోగించుకునేందుకు అవకాశం కల్పించాలని సుప్రీం కోర్టును అజర్‌ ఆశ్రయించాడు.

హైదరాబాద్‌, ఆట ప్రతినిధి: హైదరాబాద్‌ క్రికెట్‌ అసోసియేషన్‌(హెచ్‌సీఏ) ఎన్నికల్లో మాజీ అధ్యక్షుడు మహమ్మద్‌ అజారుద్దీన్‌కు చుక్కెదురైంది. అసోసియేషన్‌ ఎన్నికల్లో ఓటు హక్కు వినియోగించుకునేందుకు అవకాశం కల్పించాలని సుప్రీం కోర్టును అజర్‌ ఆశ్రయించాడు. అయితే ఈ వ్యవహారంలో వెంటనే జోక్యం చేసుకునేందుకు కోర్టు నిరాకరించింది. సోమవారం కేసును విచారించిన జస్టిస్‌ సంజయ్‌కిషన్‌ కౌల్‌, జస్టిస్‌ సుధాంశు దులియాతో కూడిన ద్విసభ్య ధర్మాసనం..

ప్రస్తుతం హెచ్‌సీఏలో ఎన్నికల ప్రక్రియ మొదలైందని, ఈ దశలో కలుగచేసుకోవడం సబబు కాదని స్పష్టం చేసింది. తదుపరి విచారణ ఈ నెల 31కి వాయిదా వేస్తున్నట్లు పేర్కొంది. ఇదిలా ఉంటే అధ్యక్ష హోదాలో కొనసాగుతూనే దక్కన్‌ బ్లూస్‌ క్లబ్‌ చీఫ్‌గా వ్యవహరించడంపై అజర్‌పై జస్టిస్‌ లావు నాగేశ్వర్‌రావు నేతృత్వంలోని ఏకసభ్య కమిటీ అనర్హత వేటు వేసిన సంగతి తెలిసిందే. దీంతోఎన్నికల్లో పోటీపడే అవకాశాన్ని అజర్‌ కోల్పోవాల్సి వచ్చింది.