Novak Djokovic : టెన్నిస్ స్టార్ ప్లేయర్ నొవాక్ జకోవిచ్ కొత్త ఏడాదిలో శుభారంభం చేశాడు. అంతేకాదు ఏడాది వివాదం తర్వాత ఆస్ట్రేలియా గడ్డపై తొలి విజయం నమోదు చేశాడు. ఆస్ట్రేలియాలో జరుగుతున్న ఆడిలైడ్ ఇంటర్నేషనల్ 32వ రౌండ్లో ఫ్రాన్స్కు చెందిన లెస్టియెన్నెపై 6-3, 6-2తో జకోవిచ్ విజయం సాధించాడు. ‘మళ్లీ ఆస్ట్రేలియాలో ఆడుతున్నందుకు నాకు చాలా సంతోషంగా ఉంది. మ్యాచ్ చూసేందుకు వచ్చిన అందరికి కృతజ్ఞతలు’ అని మ్యాచ్ అనంతరం జకోవిచ్ అన్నాడు. కొవిడ్ వ్యాక్సిన్ తీసుకోలేదనే కారణంతో అతడిని 2022 ఆస్ట్రేలియన్ ఓపెన్ ఆడేందుకు నిర్వాహకులు అనుమతించలేదు. అంతేకాదు అతనిపై మూడేళ్ల పాటు నిషేధం విధించింది. అయితే.. పోయిన ఏడాది నవంబర్లో ఆ నిషేధాన్ని ఎత్తేసింది. దాంతో, జకోవిచ్ మళ్లీ ఆస్ట్రేలియా గడ్డ మీద కాలు మోపాడు.
‘నేను ఎక్కువ విజయాలు సాధించిన దేశం, టెన్నిస్ ఆటగాడిగా నన్ను ఎంతో ఇష్టపడిని దేశం ఆస్ట్రేలియా. నేను 2008లో ఇక్కడే తొలి గ్రాండ్స్లామ్ గెలిచాను. ఇప్పటివరకూ 9 ఆస్ట్రేలియన్ ఓపెన్ టైటిళ్లు సాధించాను. ఈ గడ్డ మీద నేను ఎన్నో గొప్ప మ్యాచ్లు ఆడాను. ఇక్కడ ఆడుతుంటే నా ఉత్తమ ఆట బయటకు వస్తుంది’ అని జకోవిచ్ అన్నాడు. ఇతను ఇప్పటివరకూ 21 గ్రాండ్ స్లామ్స్ గెలిచాడు. ఫెదరర్, నాదల్ వంటి స్టార్ ఆటగాళ్లను ఎదుర్కొంటూ టెన్నిస్లో కొత్త ఛాంపియన్గా అవతరించాడు. అంతేకాదు నంబర్ 1 ర్యాంక్ కూడా సొంతం చేసుకున్నాడు.