Australian Open | ప‌దోసారి ఆస్ట్రేలియ‌న్ ఓపెన్ ఫైన‌ల్లో జ‌కోవిచ్.. టైటిల్ పోరులో సిట్సిపాస్‌తో అమీతుమీ

నొవాక్ జ‌కోవిచ్ ప‌దోసారి ఆస్ట్రేలియ‌న్ ఓపెన్ ఫైన‌ల్లో అడుగుపెట్టాడు. సెమీఫైన‌ల్లో టామి పౌల్‌ను 7-5, 6-1, 6-2తో చిత్తు చేశాడు. టైటిల్ పోరులో సిట్సిపాస్‌తో అమీతుమీకి సిద్ధ‌మ‌య్యాడు.

Australian Open : మాజీ వ‌ర‌ల్డ్ నంబ‌ర్ వ‌న్ నొవాక్ జ‌కోవిచ్ ప‌దోసారి ఆస్ట్రేలియ‌న్ ఓపెన్ ఫైన‌ల్లో అడుగుపెట్టాడు. మెల్‌బోర్న్ పార్క్‌లోని లార్డ్ లావెర్ అరెనాలో శుక్ర‌వారం జ‌రిగిన‌ పురుషుల సింగిల్స్ సెమీఫైన‌ల్లో టామి పౌల్ (అమెరికా)ను చిత్తు చేశాడు. రెండు గంట‌ల 20 నిమిషాల పాటు జ‌రిగిన మ్యాచ్‌లో 7-5, 6-1, 6-2తో ఓడించాడు. మెల్‌బోర్న్ పార్కులో జ‌కోవిచ్‌కు ఇది వ‌రుస‌గా 26వ విజ‌యం. దాంతో, ప‌దోసారి ఈ టోర్నీ ఫైన‌ల్ చేరిన తొలి ఆట‌గాడిగా రికార్డు క్రియేట్ చేశాడు. టైటిల్ పోరులో స్టెఫ‌నోస్ సిట్సిపాస్‌తో అమీతుమీకి సిద్ధ‌మ‌య్యాడు. స్టెఫానో.. రెండు రోజుల్లో నిన్ను క‌లుస్తాను అని మ్యాచ్ అనంత‌రం జ‌కోవిచ్ అన్నాడు. 22వ గ్రాండ్‌స్లామ్ వేట‌లో ఉన్న జ‌కోవిచ్ నాద‌ల్ రికార్డును స‌మం చేసేందుకు అడుగు దూరంలో ఉన్నాడు. ఈ సెర్బియా స్టార్ గ్రాండ్‌స్లామ్ ఫైన‌ల్ చేర‌డం ఇది 33వ సారి.

క‌రోనా వ్యాక్సిన్ వివాదం కారణంగా పోయిన ఏడాగి జ‌కోవిచ్ ఆస్ట్రేలియ‌న్ ఓపెన్‌కు దూర‌మయ్యాడు. అయితే.. ఆ స‌మ‌యం త‌న శ‌రీరాన్ని, ఆట‌ను మెరుగుప‌రుచుకునేందుకు ఎంతో సాయ‌ప‌డిందని అత‌ను వెల్ల‌డించాడు. పున‌రాగ‌మ‌నం త‌ర్వాత అత‌నికి ఎదురే లేకుండా పోయింది. వ‌రుస విజ‌యాలు సాధించిన జకోవిచ్ ఊహించిన‌ట్టుగానే ఫైన‌ల్ చేరాడు. ఈ టోర్నీలో జ‌కోవిచ్‌కు గ‌ట్టి పోటీనిచ్చే ఆట‌గాళ్లు క‌రువ‌య్యారు. వ‌ర‌ల్డ్ నంబ‌ర్ వ‌న్ కార్లోస్ అల్క‌రాజ్ గాయంతో టోర్నీ నుంచి ముందుగానే త‌ప్పుకున్నాడు. రెండో సీడ్ ర‌ఫెల్ నాద‌ల్ పోరాటం రెండో రౌండ్‌లోనే ముగిసింది. అమెరికా ఆట‌గాడు మెక్‌డొనాల్డో చేతిలో స్పెయిన్ బుల్ ప‌రాజ‌యం చెందాడు.