అజాజ్ ప‌టేల్ అద్భుతం.. ఒకే ఇన్నింగ్స్‌లో 10 వికెట్లు తీసిన కివీస్ స్పిన్న‌ర్‌

ముంబై: అజాజ్ యూనిస్ ప‌టేల్‌.. పుట్టింది బాంబేలోనే.. కానీ ఆడుతోంది న్యూజిలాండ్‌కు. పుట్టిన స్వంత ఊళ్లోనే అజాజ్ అరుదైన రికార్డు క్రియేట్ చేశాడు. నిజానికి 8 ఏళ్ల వ‌య‌సులో అజాల్ ఫ్యామిలీ న్యూజిలాండ్‌కు వెళ్లి అక్క‌డ స్థిర‌ప‌డింది. అయితే గ‌త కొన్నేళ్ల నుంచి కివీస్‌కు ఆడుతున్న అజాజ్ ప‌టేల్‌.. వాంఖ‌డే స్టేడియంలో జ‌రుగుతున్న రెండ‌వ టెస్టులో త‌న స్పిన్ మాయాజాలాన్ని ప్ర‌ద‌ర్శించాడు. స్పిన్ బౌలింగ్‌ను చాలా కాన్ఫిడెంట్‌గా, ఈజీగా ఆడే.. భార‌త బ్యాట‌ర్ల‌ను అజాజ్ ముప్పుతిప్ప‌లు పెట్టాడు. ఆజాజ్ ధాటికి ఇండియా బ్యాట‌ర్లు క్యూక‌ట్టారు. ఇండియాతో జ‌రుగుత‌న్న రెండ‌వ టెస్టు తొలి ఇన్నింగ్స్‌లో ఏకంగా 10 వికెట్లు తీసి అరుదైన ఘ‌న‌త‌ను సొంతం చేసుకున్నాడు.

Only the third bowler to claim all 10 wickets in an innings in the history of Test cricket 🔥

Take a bow, Ajaz Patel! #WTC23 | #INDvNZ | https://t.co/EdvFj8QtKD pic.twitter.com/negtQkbeKd

— ICC (@ICC) December 4, 2021

గ‌తంలో ఈ ఘ‌న‌త‌ను అందుకున్న‌వారిలో ఇండియ‌న్ స్పిన్న‌ర్ అనిల్ కుంబ్లే, జిమ్ లేక‌ర్‌లు ఉన్నారు. పాకిస్థాన్‌తో జ‌రిగిన టెస్టులో కుంబ్లే మొత్తం 10 వికెట్లు తీసుకున్న విష‌యం తెలిసిందే. ఇవాళ అజాజ్ సూప‌ర్ షో ధాటికి ఇండియా త‌న తొలి ఇన్నింగ్స్‌లో 325 ర‌న్స్‌కు ఆలౌటైంది. మ‌యాంక్ 150, అక్ష‌ర్ ప‌టేల్ 52 ర‌న్స్ స్కోర్ చేశారు. తొలి టెస్టులో ఇండియా విక్ట‌రీని అడ్డుకున్న బ్యాట‌ర్ల‌లో అజాజ్ కూడా ఉన్నాడు. అయితే ఒకే ఇన్నింగ్స్‌లో ప‌ది వికెట్లు తీసి అజాజ్ చ‌రిత్ర సృష్టించాడు. అజాజ్ ఈ మ్యాచ్‌ తొలి ఇన్నింగ్స్‌లో 47.5 ఓవ‌ర్లు వేసి 119 ర‌న్స్ ఇచ్చి 10 వికెట్ల‌ను త‌న ఖాతాలో వేసుకున్నాడు.