Rahmanullah Gurbaz: నిరాశ్రయుల జీవితాల్లో దీపావళి వెలుగులు నింపిన అఫ్గాన్ స్టార్ ఓపెనర్.. వీడియో వైరల్

Rahmanullah Gurbaz: అహ్మదాబాద్‌ పురవీధుల్లో రాత్రిపూట  రోడ్డు పక్కన  పడుకున్న నిరాశ్రయులను చూసి చలించాడు. వెంటనే  వారికి తనకు చేతనైన  ఆర్థిక సాయం చేసి వారి దీపావళిని మరింత ప్రత్యేకం చేశాడు.

Rahmanullah Gurbaz: గూడు లేని నిరాశ్రయులను చూసి చలించిన అఫ్గానిస్తాన్‌ స్టార్‌ ఓపెరన్‌ రెహ్మనుల్లా గుర్బాజ్‌  మంచి మనసు చాటుకున్నాడు.  వన్డే వరల్డ్‌ కప్‌లో భాగంగా  భారత్‌లో ఉన్న గుర్బాజ్‌.. ఇటీవలే దక్షిణాఫ్రికాతో ముగిసిన తమ ఆఖరి లీగ్‌ మ్యాచ్‌ తర్వాత  అహ్మదాబాద్‌ పురవీధుల్లో రాత్రిపూట  రోడ్డు పక్కన  పడుకున్న నిరాశ్రయులను చూసి చలించాడు. వెంటనే  వారికి తనకు చేతనైన  ఆర్థిక సాయం చేసి వారి దీపావళిని మరింత ప్రత్యేకం చేశాడు.  ఇందుకు సంబంధించిన వీడియో ఒకటి నెట్టింట  వైరల్‌ అవుతోంది.

శనివారం రాత్రి అహ్మదాబాద్‌లో ఓ రోడ్డు పక్కన ఉన్న పేదలను చూసి చలించిన  గుర్బాజ్‌.. వారి నిద్రకు భంగం కలిగించకుండా ఒక్కొక్కరి వద్ద  రూ. 500 నోటును పెట్టి  వెళ్లిపోయాడు.  అటుగా వెళ్తున్న  ఓ వ్యక్తి  వీడియోను తీసి దానిని  సోషల్  మీడియాలో పోస్ట్‌ చేయడంతో అది కాస్తా వైరల్‌ అయింది.  గుర్బాజ్‌  చేసిన  సాయంపై  నెటిజన్లు హర్షం వ్యక్తం చేస్తున్నారు. గుర్బాజ్‌ చేసిన ఆర్థిక సాయం ఎంతైనా ఆ పేదలు  దీపావళిని సంతోషంగా గడుపుతారని కామెంట్స్‌ చేస్తున్నారు.

 

Rahmanullah Gurbaz silently gave money to the needy people on the streets of Ahmedabad so they could celebrate Diwali.

– A beautiful gesture by Gurbaz. pic.twitter.com/6HY1TqjHg4

— Mufaddal Vohra (@mufaddal_vohra) November 12, 2023

కాగా ఈ మెగా టోర్నీలో  గుర్బాజ్‌ ఆశించినస్థాయిలో రాణించలేకపోయాడు.  9 మ్యాచ్‌లు ఆడిన  గుర్బాజ్‌..  31.11 సగటుతో 280 పరుగులు మాత్రమే చేయగలిగాడు.  వరల్డ్‌ కప్‌కు ముందు పలు ద్వైపాక్షిక సిరీస్‌లలో   భారీగా పరుగులు చేసిన  అతడు.. మెగా టోర్నీలో మాత్రం విఫలమయ్యాడు.