Mobile Phone | మొదటి మొబైల్‌ కాల్‌కు 50 ఏండ్లు పూర్తి

Mobile Phone | ఒకపూట తినకపోయినా ఉంటా ఉండలేరు కొందరు. పసిబిడ్డలను లాలించాలన్నా, వయోవృద్ధుల కాలక్షేపానికైనా సెల్‌ఫోనే ఆధారం ఇప్పుడు. ఒకరకంగా చెప్పాలంటే మనుషుల జీవితాల్లో సెల్‌ఫోన్‌ భాగమైంది. కాళ్లు, చేతుల్లానే సెల్‌ కూడా ఒక అవయవంలా మారిపోయింది.

Mobile Phone |  న్యూఢిల్లీ: ఒకపూట తినకపోయినా ఉంటా ఉండలేరు కొందరు. పసిబిడ్డలను లాలించాలన్నా, వయోవృద్ధుల కాలక్షేపానికైనా సెల్‌ఫోనే ఆధారం ఇప్పుడు. ఒకరకంగా చెప్పాలంటే మనుషుల జీవితాల్లో సెల్‌ఫోన్‌ భాగమైంది. కాళ్లు, చేతుల్లానే సెల్‌ కూడా ఒక అవయవంలా మారిపోయింది. ఇప్పుడు ఇంతలా వినియోగిస్తున్న సెల్‌ఫోన్‌ వయస్సు 50 ఏండ్లు నిండింది.

1973 ఏప్రిల్‌ 3న సెల్‌ఫోన్‌ నుంచి మొదటి ఫోన్‌ కాల్‌ చేశారు దాని సృష్టికర్త మార్టిన్‌ కూపర్‌. ఆయన అప్పట్లో మోటొరోలా సంస్థలో పని చేసేవారు. న్యూయార్క్‌లోని సిక్త్స్‌ అవెన్యూ 53వ, 54వ వీధుల మధ్య నడుస్తూ సెల్‌ఫోన్‌ నుంచి ఆయన మొదటి ఫోన్‌ కాల్‌ మాట్లాడారు. ఆ సమయంలో మోటొరోలాకు ప్రత్యర్థి సంస్థ అయిన బెల్‌ ల్యాబొరేటరీస్‌కు చెందిన ఇంజినీర్‌ జోయెల్‌ ఎంజెల్‌కు కూపర్‌ ఫోన్‌ చేయడం విశేషం. ‘జోయెల్‌.. నేను మార్టిన్‌. నేను సెల్‌ ఫోన్‌ నుంచి మాట్లాడుతున్నాను. చేతుల్లో పట్టుకోదగిన నిజమైన పోర్టబుల్‌ సెల్‌ఫోన్‌ ఇది’ అంటూ మార్టిన్‌ సంభాషణ సాగింది.

మొదటి సెల్‌ఫోన్‌ విశేషాలు

• మొదటి సెల్‌ఫోన్‌ పేరు డైనాటాక్‌(డైనమిక్‌ అడాప్టివ్‌ టోటల్‌ ఏరియా కవరేజ్‌)
• ఇది దాదాపుగా చెప్పుల డబ్బా అంత పెద్దగా ఉండేది. కిలో బరువు ఉండేది.
• 25 నిమిషాలు ఫోన్‌ మాట్లాడేందుకు 10 గంటలు ఛార్జింగ్‌ పెట్టాల్సి వచ్చేది.
• కనిపెట్టిన పదేండ్లకు డైనాటాక్‌ 8000ఎక్స్‌ పేరిట అమెరికాలో మోటొరోలా సంస్థ ఈ ఫోన్‌ను విక్రయాలు ప్రారంభించింది.
• 1983లో 3,995 డాలర్లకు మొదటిసారి దీనిని విక్రయించారు. మన కరెన్సీలో ప్రస్తుత విలువ ప్రకారం దీని ధర రూ.3.28 లక్షలు