Whatsapp on International Calls | దేశంలో కొన్ని రోజులుగా వాట్సాప్ యూజర్లను ఇంటర్నేషనల్ కాల్స్ వేధిస్తున్నాయి. మలేషియా, కెన్యా, వియత్నాం, ఇథియోపియా వంటి దేశాల ఐఎస్డీ కోడ్లతో కూడిన నంబర్ల నుంచి ఎక్కువగా కాల్స్ వస్తున్నాయి. వీటిల్లో కొన్ని ఆడియో కాల్స్ కాగా, మరికొన్ని వీడియో కాల్స్ ఉంటున్నాయి. ఈ కాల్స్ చేస్తున్న వారెవరు? వారి అసలు ఉద్దేశం ఏమిటి? ఇండియన్స్ నంబర్లు వారికి ఎలా తెలిశాయనే వివరాలైతే తెలియడం లేదు. కొన్ని రోజులుగా యూజర్లు తమకు వస్తున్న వాట్సాప్ కాల్స్ పై సోషల్ మీడియాలో పోస్టులు పెడుతున్నారు. ఈ నేపథ్యంలో వాట్సాప్ యాజమాన్యం దీనిపై రియాక్టయింది.
ఇంటర్నేషనల్ కాల్స్ వచ్చినప్పుడు వెంటనే సదరు నంబర్ బ్లాక్ చేసి, రిపోర్ట్ చేయాలని యూజర్లకు వాట్సాప్ సూచించింది. రిపోర్ట్ చేయగానే సదరు నంబర్ మీద తగు చర్యలు తీసుకుంటామని తెలిపింది. దేశీయంగా గానీ, విదేశాల నుంచి గానీ ఏ అనుమానాస్పద కాల్స్, ఎస్సెమ్మెస్లు వచ్చినా రిపోర్ట్ చేయాలని సలహా ఇచ్చింది. పర్సనల్ డిటైల్స్ తెలియకుండా ప్రైవసీ కంట్రోల్ లోకి వెళ్లి, కాంటాక్టుల్లోని వ్యక్తులకే కనిపించేలా ఏర్పాట్లు చేసుకోవాలని హితవు చెప్పింది. మోసగాళ్ల నుంచి యూజర్లకు రక్షణ కల్పించడానికి తాము ఇప్పటికే అవగాహన కార్యక్రమాలు చేపట్టామని తెలిపింది. తమ ప్లాట్ ఫామ్ మరింత సురక్షితంగా తీర్చిదిద్దడానికి తగు చర్యలు తీసుకుంటున్నట్లు వివరించింది.
మామూలుగా అంతర్జాతీయ కాల్స్ చేసేవారు ఫేక్ జాబ్ ఆఫర్లతో యూజర్లకు ఆకట్టుకోవడానికి ట్రై చేస్తారు. కొన్నిసార్లు యూ-ట్యూబ్ వీడియోలకు లైక్ కొట్టండి.. వీడియోకు భారీ మొత్తం పే చేస్తామని ఆఫర్ చేస్తారు. భారీ మొత్తం చెల్లించే ఆఫర్ చూపి, సైబర్ మోసగాళ్లు పెద్దమొత్తంలో దోచుకునే ముప్పు పొంచి ఉందని నిపుణులు చెబుతున్నారు.
మరికొందరు మోసగాళ్లు.. వర్క్ ఫ్రం హోం పేరిట మోసాలు చేస్తున్నారని టెక్నాలజీ ప్రొఫెషనల్స్ చెబుతున్నారు. కనుక అనుమానాస్పద కాల్స్ లిఫ్ట్ చేయకపోవడమే మంచిదని సూచిస్తున్నారు. ఈ తరహా కాల్స్ వస్తే సదరు నంబర్ మీద క్లిక్ చేస్తూ.. త్రీ డాట్స్ మెనూలోకి వెళ్లి ‘బ్లాక్’ చేయాలని సూచిస్తున్నారు. ఇలా ఒకసారి బ్లాక్ చేసిన నంబర్ నుంచి తర్వాత ఎటువంటి కాల్స్, ఎస్సెమ్మెస్లు రావు.