Visit:
కడ్తాల్‌, నవంబర్‌ 30 : గల్లీలో కుస్తీ.. ఢిల్లీలో దోస్తీ అన్నట్లు వ్యవహరిస్తున్న బీజేపీ, కాంగ్రెస్‌ పార్టీలు తోడు దొంగలని మాజీ మంత్రి, సిద్దిపేట ఎమ్మెల్యే హరీశ్‌రావు మండిపడ్డారు. స్థానిక సంస్థల ఎన్నికల ఓట్ల కోసం గ్రామాల్లోకి వచ్చే తోడుదొంగల పార్టీల నాయకులను తరిమికొట్టాలని పిలుపునిచ్చారు. మండలంలోని ముద్విన్‌ గ్రామంలోని బీజేపీకి చెందిన 60 మంది నాయకులు, కార్యకర్తలతోపాటు బీఎస్సీ మండల నాయకుడు మహేశ్‌ తదితరులు మాజీ ఎమ్మెల్యే జైపాల్‌యాదవ్‌ సమక్షంలో ఆదివారం హైదరాబాద్‌లోని హరీశ్‌రావు నివాసంలో ఆయన సమక్షంలో బీఆర్‌ఎస్‌లో చేరారు.
ఈ సందర్భంగా మాజీ మంత్రి మాట్లాడుతూ.. కేంద్రంలోని బీజేపీ, రాష్ట్రంలోని కాంగ్రెస్‌ పార్టీ ప్రజా వ్యతిరేక విధానాలను అనుసరిస్తుండడంతో.. గ్రామాల్లోని బీజేపీ, కాంగ్రెస్‌ పార్టీల కార్యకర్తలు, నాయకులు బీఆర్‌ఎస్‌లో చేరుతున్నారన్నారు. రాష్ట్ర ప్రయోజనాలను కాపాడటంలో రేవంత్‌ సర్కార్‌ పూర్తిగా విఫలమైందని విమర్శించారు. బీజేపీకి 8 మంది ఎంపీలున్నా తెలంగాణకు ఒక్క మెడికల్‌ కళాశాలనూ తీసుకురాలేకపోయారని మండిపడ్డారు.
కేంద్రం పక్క రాష్ర్టాలకు రూ.వేల కోట్లు ఇస్తున్నా.. మన రాష్ర్టానికి నిధులు తీసుకురాలేక బీజేపీ, కాంగ్రెస్‌ ఎంపీలు చతికిలపడ్డారని ఎద్దేవా చేశారు. స్థానిక సంస్థల ఎన్నికల ఓట్ల కోసం గ్రామాల్లోకి వచ్చే కాంగ్రెస్‌, బీజేపీ నాయకులను నిలదీయాలని పిలుపునిచ్చారు. తెలంగాణ రైతాంగంపై బీజేపీ సవతితల్లి ప్రేమను చూపుతున్నదని మండిపడ్డారు. కార్యక్రమంలో బీఆర్‌ఎస్‌ మండలాధ్యక్షుడు పరమేశ్‌, డీసీసీబీ డైరెక్టర్‌ వెంకటేశ్‌గుప్తా, మాజీ జడ్పీటీసీ దశరథ్‌నాయక్‌, సర్పంచ్‌ల సంఘం మాజీ రాష్ట్ర అధ్యక్షుడు లక్ష్మీనర్సింహారెడ్డి, బీఆర్‌ఎస్‌ పార్టీ ముద్విన్‌, కడ్తాల్‌ గ్రామాల అధ్యక్షులు రాజు, రామకృష్ణ, మాజీ ఉప సర్పంచ్‌ వినోద్‌, నాయకులున్నారు.
