‘వాళ్లిద్దరిదీ భ్రమరకీట సంబంధం. చాలా గొప్పది కూడా!’ అంటుంటారు పెద్దలు. భ్రమరకీట సంబంధం/ భ్రమరకీట న్యాయం అంటే గురుశిష్య సంబంధం. తండ్రీకొడుకుల అనుబంధమూ కావచ్చు. భ్రమరం అంటే తుమ్మెద. కీటం అంటే పురుగు. ప్రయత్నపూర్వకంగా ఒక సామాన్యుడిని తనంతటి వాణ్ని చెయ్యడం. అంటే.. గురువు శిష్యులకు తనకు తెలిసిన విద్యలన్నీ నేర్పడం. ఓ తండ్రి తన కొడుక్కి మంచిచెడ్డలు బోధించి..
ఉత్తమ పౌరుడిగా తీర్చిదిద్దడం. అప్పుడే పుట్టిన తేనెటీగ చుట్టూ.. తుమ్మెద ఝంకారం చేస్తూ పరిభ్రమిస్తుంటుంది. అది చూసిన ఈ చిన్న పురుగు సైతం తన రెక్కలు ఆడిస్తూ.. ఎగరడం నేర్చుకుంటుంది. తర్వాత దానంతట అదే ఆహారాన్ని సమకూర్చుకుంటుంది. అభివృద్ధిలోకి తెచ్చినవాడు భ్రమరం.. అభివృద్ధికి వచ్చినవాడు కీటం. వీరిద్దరి మధ్య సంబంధమే భ్రమరకీట న్యాయం.