క్రోధి కోరిక

క్రోధి నామ వత్సరం తెలుగు కొత్త వత్సరం ఖాయముగా మాయజేయు మనుషుల మద మత్సరం

April 9, 2024 / 01:52 AM IST

క్రోధి నామ వత్సరం
తెలుగు కొత్త వత్సరం
ఖాయముగా మాయజేయు
మనుషుల మద మత్సరం
వేప కొసల వెండి పూత
తీయని కోయిల కూత
పులుపు, వగరు కలయిక గల
మామిడి పిందెల కాత
పంచాంగపు శ్రవణాలతో
గుడి గంటల మోత
ఆరు రుతువులకు రాజు
ఈ ఉగాది ఆమని
ప్రకృతికే కొత్త కాంతి మన
వసంత యామిని
తీపీ, పులుపూ, ఉప్పూ
చేదు, వగరు, కారం
అను ఆరురుచులు
నిత్యపు జీవనాన అనివార్యం
శిశిరం ఆకులు రాల్చిన
చెట్టెప్పుడు కుంగదు
చివురు వేయు చేవ ఉన్న
వసంతమెపుడు పొంగదు
మండుటెండలతో గ్రీష్మం అహం హుంకరించినా
వర్షరుతువు స్వాగతింప చల్లబడుట మానదు
శరన్మేఘ మాలిక వలె హేమంతపు చలిమంటలు
కాలపు సహకారంతో పండును బతుకుల పంటలు
వైవిధ్యపు భారత రథ రుతుచక్ర భ్రమణం
మనసును ఇరుసుగ మార్చెడి మనజీవన గమనం
రుచులు ఆరు రుతువులారు
ఉగాది ఏమని కోరు?
మంచి పెంచి పంచడమే మన మనుగడ తీరు
భిన్నత్వపు ఏకత్వం భారతీయ తత్వం
వైవిధ్యపు గమనమే
అసలగు జీవన సత్యం
కులాల కుడ్యము దాటి
గుణమును గౌరవించుదాం
మతాల మౌఢ్యం లేని
మానవతను పంచుదాం
శ్రీ క్రోధి నామ ఉగాదిని
ఊపిరెత్తి పిలుద్దాం
తెలుపు మనసు తెలుగులమై
‘నిషాన’గా నిలుద్దాం…