HCL H-1B Violation | హెచ్‌-1బీకి హెచ్‌సీఎల్ దోఖా.. అమెరిక‌న్ల కంటే త‌క్కువ వేత‌నాలు!

HCL H-1B Violation | హెచ్‌-1బీ వీసా నిపుణుల‌కు హెచ్‌సీఎల్ అమెరిక‌న్ల కంటే త‌క్కువ వేత‌నాలిస్తున్న‌ద‌ని ప్ర‌జావేగు సంస్థ ఆరోపించింది.

HCL H-1B Violation | హెచ్‌సీఎల్ టెక్నాల‌జీస్‌.. అమెరికాలో హెచ్‌-1 బీ వీసా కింద ప‌ని చేస్తున్న ఉద్యోగుల‌కు అమెరిక‌న్ల కంటే త‌క్కువ వేత‌నాలు చెల్లిస్తున్న‌ద‌ని ప్ర‌జా వేగు సంస్థ ఆరోపించింది. గ‌త కొన్నేండ్లుగా హెచ్‌-1బీ వీసా కింద ప‌ని చేస్తున్న నిపుణుల‌కు 95 మిలియ‌న్ల డాల‌ర్లు మాత్ర‌మే చెల్లిస్తున్న‌ద‌ని పేర్కొంటూ ఎక‌న‌మిక్ పాల‌సీ ఇన్‌స్టిట్యూట్ (ఈపీఐ) ఒక నివేదిక‌ను రూపొందించింది. అమెరిక‌న్ ఉద్యోగుల కంటే హెచ్‌-1బీ వీసా నిపుణుల‌కు హెచ్‌సీఎల్ టెక్నాల‌జీస్ త‌క్కువ వేత‌నాలు చెల్లిస్తున్న‌ద‌ని స‌మాచారం. ప్ర‌తియేటా అమెరికాలో హెచ్‌-1బీ వీసా పొందుతున్న మూడు అతిపెద్ద ఐటీ సంస్థ‌ల్లో ఇది ఒక‌టి. గ‌తేడాది పొందిన హెచ్‌-1బీ వీసాల్లో హెచ్‌సీఎల్ ఎనిమిదో స్థానంలో ఉంది. 1405 కొత్త వీసాలు జారీ కాగా, 2801 మంది వీసాలు రెన్యూవ‌ల్ అయ్యాయి. 2009 నుంచి హెచ్‌సీఎల్ ఇప్ప‌టివ‌ర‌కు 31 వేల హెచ్‌-1 బీ వీసాల‌ను పొందింది.

అతిపెద్ద కార్పొరేష‌న్ల‌లో హెచ్‌1బీ నిపుణులు ఇలా

డిస్నీ, ఫెడ్ఈఎక్స్‌, గూగుల్ త‌దిత‌ర పేరొందిన కార్పొరేష‌న్ల‌లో హెచ్‌-1బీ వీసా పొందిన వ‌ల‌స కార్మికులు స‌బ్ కాంట్రాక్ట‌ర్లుగా ప‌ని చేస్తున్నార‌ని, వారికి అతి త‌క్కువ‌గా 95 మిలియ‌న్ల డాల‌ర్లే చెల్లిస్తున్నార‌ని ఈపీఐ ప్ర‌తినిధులు రొన్ హిరా, డానియ‌ల్ కొస్టా త‌మ నివేదిక‌లో పేర్కొన్నారు. బాధితుల్లో హెచ్‌-1బీ వ‌ర్క‌ర్లు మాత్ర‌మే కాదు.. అమెరిక‌న్ వ‌ర్క‌ర్లు కూడా ఉన్నారు. అమెరిక‌న్ వ‌ర్క‌ర్ల‌కు స్థాన‌భ్రంశం క‌ల్పించ‌డం గానీ, వారిని త‌క్కువ వేత‌నాల‌కు ప‌ని చేస్తున్న వ‌ల‌స కార్మికుల‌తో క‌లిపేయ‌డం గానీ చేస్తున్నార‌ని తెలిపారు.

ఒరాకిల్‌లో 55వేల డాల‌ర్లే

ఉదాహ‌ర‌ణ‌కు ఒరాకిల్‌లో ప‌ని చేస్తున్న హెచ్‌-1బీ వీసా నిపుణులు 55 వేల డాల‌ర్లు మాత్ర‌మే పొందుతున్నారు. ఇది అమెరిక‌న్ వ‌ర్క‌ర్ల కంటే త‌క్కువ‌. ఇది పూర్తిగా హెచ్‌-1బీ ప్రోగ్రాం నిబంధ‌న‌ల‌ను పూర్తిగా ఉల్లంఘించ‌డ‌మేన‌న్న అభిప్రాయాలు వినిపిస్తున్నాయి. కానీ ఈ ఆరోప‌ణ‌ల‌ను హెచ్‌సీఎల్ టెక్నాల‌జీస్ అధికార ప్ర‌తినిధి నిరాక‌రించారు. చ‌ట్టాల‌కు లోబ‌డి ఉద్యోగులంద‌రికీ వేత‌నాలు చెల్లిస్తున్నామ‌ని తెలిపారు.

హెచ్‌-1బీ నిపుణుల‌కు ఔట్‌సోర్సింగ్ జాబ్స్‌!

హెచ్‌సీఎల్ టెక్నాల‌జీస్ వంటి ఐటీ దిగ్గ‌జాలు.. హెచ్‌-1బీ వీసా నిపుణుల‌కు నిబంధ‌న‌ల‌కు అనుగుణంగా వేత‌నాలివ్వ‌డంలో చ‌ట్టాల్లో లొసుగుల‌ను వాడుకుంటున్నాయ‌ని ఆరోప‌ణ‌లు ఉన్నాయి. హెచ్-1బీ వీసా కింద అమెరికాకు వెళ్లిన భార‌తీయ నిపుణుల‌కు నేరుగా నియామ‌క ఉత్త‌ర్వులు ఇవ్వ‌కుండా ఔట్ సోర్సింగ్ సంస్థ‌ల ద్వారా నియామ‌కాలు చేప‌డుతున్నాయ‌ని స‌మాచారం. క‌నుక డిపార్ట్‌మెంట్ ఆఫ్ లేబ‌ర్ (డీవోఎల్‌) అధికారులు ఈ లొసుగుల‌ను తొల‌గించి, అమెరిక‌న్లు, హెచ్‌-1బీ వీసా నిపుణుల హ‌క్కుల‌ను కాపాడాల‌ని ఈపీఐ సూచించింది.