కొట్టేసిన సొమ్ము బెట్టింగ్‌లోకి..?

కస్టమర్ల ఖాతాల నుంచి రూ.కోట్లు కొల్లగొట్టి పరారైన యూనియన్‌ బ్యాంక్‌ మేనేజర్‌ అజయ్‌ను పోలీసులు అదుపులోకి తీసుకుని విచారిస్తున్నారు. కొట్టేసిన డబ్బు ఏం చేశాడు.. ఎక్కడ దాచాడనే దానిపై ప్రశ్నిస్తున్నారు.

• స్టాక్‌మార్కెట్‌లోనూ పెట్టిన మేనేజర్‌!
• కోట్లు కొల్లగొట్టి పరారైన అజయ్‌
• అదుపులోకి తీసుకుని విచారిస్తున్న పోలీసులు
• ఠాణాకు తరలివచ్చిన బాధితులు

వినాయక నగర్‌, జూలై 22: కస్టమర్ల ఖాతాల నుంచి రూ.కోట్లు కొల్లగొట్టి పరారైన యూనియన్‌ బ్యాంక్‌ మేనేజర్‌ అజయ్‌ను పోలీసులు అదుపులోకి తీసుకుని విచారిస్తున్నారు. కొట్టేసిన డబ్బు ఏం చేశాడు.. ఎక్కడ దాచాడనే దానిపై ప్రశ్నిస్తున్నారు. అయితే, బెట్టింగ్‌తో పాటు స్టాక్‌మార్కెట్‌లో పెట్టినట్లు విశ్వసనీయంగా తెలిసింది. నిజామాబాద్‌ జిల్లా కేంద్రంలోని యూనియన్‌ బ్యాంక్‌ మేనేజర్‌ అజయ్‌.. రుణాల పేరిట 25 మంది కస్టమర్లను బురిడీ కొట్టించి రూ.4 కోట్లకు పైగా కాజేసిన సంగతి తెలిసిందే. బాధితుల ఫిర్యాదుతో రంగంలోకి దిగిన పోలీసులు ఎట్టకేలకు నిందితుడ్ని అదుపులోకి తీసుకుని నిజామాబాద్‌కు తరలించారు.

ఏసీపీ రాజావెంకటరెడ్డి పర్యవేక్షణలో సీఐ నరహరి ఆధ్వర్యంలో సోమవారం ఉదయం నుంచి రాత్రి వరకు అజయ్‌ను సుదీర్ఘంగా ప్రశ్నించినట్లు సమాచారం. అయితే, తన వద్ద ప్రస్తుతం డబ్బులు లేవని మేనేజర్‌ చెప్పినట్లు తెలిసింది. కాజేసిన సొమ్మును ఏం చేశాడనే కోణంలో ఆరా తీసేందుకు యత్నిస్తుండగా, నిందితుడు సహకరించలేదని సమాచారం. మరోవైపు, మేనేజర్‌ను పట్టుకొచ్చారని తెలిసిన బాధితులు ఉదయమే ఠాణా వద్దకు చేరుకున్నారు. రాత్రి పొద్దుపోయే వరకు అక్కడే పడిగాపులు కాశారు. ఒక్కొక్కరిని ఏ విధంగా మోసగించాడో బాధితులు పోలీసుల వద్ద వెల్లడించారు. ముద్ర లోన్‌ కోసం ఓ వ్యక్తి సంప్రదించగా, డాక్యుమెంట్లు సహా అన్ని తాను చూసుకుంటానని చెప్పిన మేనేజర్‌ అజయ్‌.. రూ.8 లక్షల రుణం మంజూరయ్యేలా చూశాడు. అయితే, తనకు డబ్బు అవసరముందని, మూడు నెలల తర్వాత తిరిగి ఇస్తానని, అప్పటిదాకా వడ్డీ తానే చెల్లిస్తానని చెప్పి తీసుకున్నాడు. మిగతా బాధితులు వద్ద కూడా ఇలాగే సొమ్ము తీసుకున్నట్లు తెలిసింది.