ఇక ఏఐ డ్రైవింగ్‌ టెస్ట్‌ ట్రాక్‌లు

డ్రైవింగ్‌ పరీక్షను పారదర్శకంగా నిర్వహించడానికి ఆర్టీఏ ఏఐ సేవలను వినియోగించనుంది.

సిటీబ్యూరో, అక్టోబర్‌ 16 (నమస్తే తెలంగాణ) : డ్రైవింగ్‌ పరీక్షను పారదర్శకంగా నిర్వహించడానికి ఆర్టీఏ ఏఐ సేవలను వినియోగించనుంది. ఇటీవల ఇతర రాష్ర్టాల్లో అమలవుతున్న ఏఐ విధానాలను అధ్యయనం చేసిన ఆర్టీఏ బృందం తెలంగాణలోనూ అన్ని ఆర్టీఏ కార్యాలయాల్లో ఏఐ తీసుకురాబోతుంది. అందులో భాగంగా తొలుత పైలెట్‌ ప్రాజెక్ట్‌గా నాగోల్‌, కొండాపూర్‌ డ్రైవింగ్‌ ట్రాక్‌లలో ఏఐ ప్రక్రియను అమలు చేయడానికి రెడీ అయింది. డ్రైవింగ్‌ పరీక్షల్లో అక్రమాలు జరుగుతున్నట్టు ఏసీబీ సోదాల్లో బయటపడటంతో రోడ్డు ప్రమాదాల కట్టడిలో భాగంగా ఆ పరీక్షను మరింత కఠినంగా నిర్వహించడానికి ఆర్టీఏ అధికారులు సిద్ధమయ్యారు.

దళారుల ప్రమేయం లేకుండా, అధికారుల జోక్యం కూడా ఉండకుండా ప్రక్రియ అంతా ఏఐతోనే నిర్వహిస్తారు. దీంతో కచ్చితంగా డ్రైవింగ్‌పై అవగాహన ఉంటేనే పరీక్ష ఉత్తీర్ణత సాధించే అవకాశం ఉంటుంది. ఏమాత్రం అవగాహన లేకున్నా లైసెన్స్‌ పొందడం కష్టమే అవుతుంది. ఈ విధానంతో చాలా మంది వాహనదారులు డ్రైవింగ్‌, రోడ్డు నిబంధనలు, ట్రాఫిక్‌ రూల్స్‌పై మరింత అధ్యయనం చేసి అవగాహన పొందే అవకాశం ఉంటుందని అధికారులు చెబుతున్నారు. ఢిల్లీ, ఉత్తర ప్రదేశ్‌, ఒడిశాలో ఏఐ విధానం సత్ఫలితాలిస్తున్నాయని వివరించారు.