హైదరాబాద్ సిటీబ్యూరో ప్రధాన ప్రతినిధి, జనవరి 27 : స్టార్టప్… ఈ పదం వినిపించగానే ఉరకలెత్తే యువతరం! అబ్బురపరిచే వినూత్న ఆవిష్కరణలు!! ఇవే గుర్తొస్తాయి. కానీ ఇకనుంచి ఈ పదం యువతకే కాదు… వయసు పైబడిన వారి వినూత్న ఆలోచనలకూ చక్కని వేదికగా మారనున్నది. గెట్సెట్అప్ అనే యాక్సిలరేటర్ ప్రోగ్రాం ద్వారా సీనియర్ల వినూత్న ఆలోచనలు, ఆవిష్కరణలతో స్టార్టప్ల ఏర్పాటుకు తొలిసారిగా అవకాశం లభించింది. ఆహారం, ఆహార సంబంధిత రంగాలు, శిక్షణ, దుస్తులు, ఉపకరణాలు, కళలు, చేతివృత్తులు… ఏ రంగంలోనైనా వ్యాపార వినూత్న ఆలోచనలు ఉన్నవారు ఇందులో భాగస్వాములు అయ్యేందుకు వీలుంటుంది. ముఖ్యంగా 55 సంవత్సరాల వయసు పైబడినవారు ప్రత్యేకంగా స్టార్టప్లను ఏర్పాటు చేసుకునేందుకు గెట్సెట్అప్ అవకాశం కల్పించనుంది. గెట్సెట్అప్ కమ్యూనిటీ 160 దేశాల్లో విస్తరించి ఉండగా… దాదాపు 40 లక్షల మందికి పైగా సభ్యులు ఉన్నారు. మార్కెటింగ్, సోషల్ మీడియా, టెక్నాలజీ తరగతులు, ఆర్థిక ప్రణాళిక వంటి విషయాల్లో సభ్యులకు సహాయపడేందుకు ఇందులో ఉచితంగా తరగతులు నిర్వహిస్తామని వ్యవస్థాపకుడు దేవల్ డెలివాటా చెప్పారు. అర్హతలు ఉన్నవారిని ఎంపిక చేసి.. వీడియోకాల్ ద్వారా ఇంటర్వ్యూలు చేస్తామని తెలిపారు. దరఖాస్తు చేసుకునే వారు తమ ఆలోచనలను, ఆవిష్కరణలను ముగ్గురు నిపుణుల బృందానికి అందించేందుకుగాను డెమో డేలో పాల్గొనాల్సి ఉంటుంది. ప్రోగామ్స్ ముగింపులో ఆర్థిక మద్దతు కోసం రెండు ఆవిష్కరణలను ఎంపిక చేస్తారు. ఆసక్తి ఉన్నవారు వచ్చేనెల నాలుగో తేదీలోపు దరఖాస్తు చేసుకోవాలి.