Srisailam Dam | శ్రీశైలం డ్యామ్‌కు వరల్డ్‌ బుక్‌ ఆఫ్‌ రికార్డ్స్‌లో చోటు

Srisailam Dam | శ్రీశైలం ప్రాజెక్టుకు అరుదైన గుర్తింపు లభించింది. వరల్డ్‌ బుక్‌ ఆఫ్‌ రికార్డ్స్‌లో చోటు దక్కింది. ఈ గుర్తింపు పత్రాన్ని శ్రీశైలం ఎమ్మెల్యేకు ప్రతినిధులు అందజేశారు.

Srisailam Dam | శ్రీశైలం: కృష్ణానది (Krishna River)పై ఆంధ్రప్రదేశ్‌లో నిర్మించిన శ్రీశైలం ప్రాజెక్టుకు అంతర్జాతీయ గుర్తింపు దక్కింది. ఈ డ్యామ్‌ విశిష్టతకు లండన్‌కు చెందిన ‘వరల్డ్‌ బుక్‌ ఆఫ్‌ రికార్డ్స్‌(World Book of Records)’లో చోటు లభించింది. దీనికి సంబంధించిన గుర్తింపు పత్రాన్ని వరల్డ్‌ బుక్‌ ఆఫ్‌ రికార్డ్స్ సౌత్‌ జోన్‌ జాయింట్‌ సెక్రటరీ ఇలియాజర్‌ శ్రీశైలం ఎమ్మెల్యే రాజశేఖర్‌ రెడ్డికి జలవనరుల శాఖ, ఏపీ జెన్‌కో, ట్రాన్స్‌కో అధికారుల సమక్షంలో అందజేశారు. దేశంలో ఈ ఘనత సాధించిన తొలి ప్రాజెక్టుగా శ్రీశైలం డ్యామ్‌ నిలిచింది.

శ్రీశైలం డ్యామ్‌ (Srisailam Dam) 2009 వరదల్లో 25.4 లక్షల క్యూసెక్కుల వరదను డ్యామ్‌ తట్టుకోవడంతో పాటు డ్యామ్‌ నిర్మాణం, నిర్మాణ శైలి, హైడ్రో ఎలక్ట్రిక్‌ పవర్‌ జనరేషన్‌ విధానం వంటి విశిష్టతలను వరల్డ్‌ బుక్‌ ఆఫ్‌ రికార్డ్స్ పరిగణించింది. అదేవిధంగా దక్షిణాసియాలో ఏ ప్రాజెక్టులోనూ లేనివిధంగా ఈ డ్యామ్‌లో 60 అడుగుల వెడల్పు, 55 అడుగుల ఎత్తు కలిగిన గేట్లు ఉండటం కూడా ఈ గుర్తింపునకు కారణం.