3 నెలలు పరిశోధించాం!

“శ్యామ్‌సింగరాయ్‌’ చిత్రంలో రెండు కథలుంటాయి. ఒకటి వర్తమానంలో జరుగుతుంది. మరొకటి 70దశకంలో జరుగుతుంది. నాటి పరిస్థితుల్ని చూపించడానికి చాలా కష్టపడ్డాం’ అన్నారు కళా దర్శకుడు అవినాష్‌ కొల్ల. నాని కథానాయకుడిగా రాహుల్‌ సంకృత్యాన్‌ దర్శకత్వంలో రూపొందిన ఈ సినిమా ఈ నెల 24న విడుదలకానుంది. ఈ సందర్భంగా చిత్ర ఆర్ట్‌ డైరెక్టర్‌ అవినాష్‌ కొల్ల మాట్లాడుతూ ‘ఈ సినిమా కోసం మూడేళ్లపాటు పరిశోధన చేశా. గత ఏడాది లాక్‌డౌన్‌ సమయంలో బెంగాల్‌లోనే ఉన్నా. కథానుగుణంగా బెంగాల్‌ వాతావరణాన్ని సృష్టించడం సవాలుగా అనిపించింది. అక్కడి ఆర్కిటెక్చర్‌, దేవాలయాలపై పూర్తిస్థాయిలో పరిశోధన చేశా. సెట్స్‌ మొత్తం హైదరాబాద్‌లోనే వేశాం. దేవాలయం నేపథ్యంలో వేసిన భారీ సెట్‌లో కీలక ఘట్టాలను తెరకెక్కించాం.

సినిమాకు అదే హైలైట్‌ అవుతుంది. ఆరు ఎకరాల్లో వేసిన ఆ సెట్‌ కోసం మూడునెలల పాటు శ్రమించాం. దేవదాసిలకు సంబంధించిన గుడి సెట్‌ కాబట్టి ప్రత్యేక శ్రద్ధ తీసుకున్నాం. ఈ సినిమా కోసం సత్యజిత్‌ రే చిత్రాలను రిఫరెన్స్‌గా తీసుకున్నా. సినిమా విజువల్స్‌ బాగా రావాలంటే కళా దర్శకత్వంతో పాటు కెమెరా పనితనం కూడా చాలా ముఖ్యం. ‘కృష్ణగాడి వీరప్రేమగాథ’ చిత్రం ద్వారా ఆర్ట్‌డైరెక్టర్‌గా అరంగేట్రం చేశాను. ‘జెర్సీ’ సినిమాకు కూడా పనిచేశా. ప్రస్తుతం నాని ‘దసరా’, రవితేజ ‘టైగర్‌ నాగేశ్వరరావు’ చిత్రాలకు కళాదర్శకత్వం వహిస్తున్నా’ అన్నారు.