లండన్: సాంకేతిక రంగంలో మరో అద్భుతం అవిష్కృతం అయింది. ఆడ లేదా మగ.. ఇలా ఒకే సెక్స్(లింగ) జంతువులను సృష్టించేందుకుగానూ జన్యు సవరణ (జీన్ ఎడిటింగ్) టెక్నాలజీని శాస్త్రవేత్తలు తాజాగా అభివృద్ధి చేశారు. ‘సీఆర్ఐఎస్పీఆర్-కాస్9’ అనే ఈ సాంకేతికత ద్వారా ఆడ లేదా మగ పిల్లలను మాత్రమే కనగలిగే ఎలుకల సంతానాన్ని ఉత్పత్తి చేశారు. దీన్ని ఫ్రాన్సిస్ క్రిక్ ఇన్స్టిట్యూట్, ది యూనివర్సిటీ ఆఫ్ కెంట్కి చెందిన నిపుణులు అభివృద్ధి చేశారు. జంతువుల్లో ఫలదీకరణం తర్వాత ఒక సెక్స్ పిండాన్ని నిష్క్రియం(ఇన్ యాక్టివేట్) చేయడంలో ఈ టెక్నాలజీ పనిచేస్తుంది. ఈ సాంకేతికత జంతు సంక్షేమాన్ని మెరుగుపరిచే అవకాశం ఉందని, లింగ అసమానత్వంతో అంతరించిపోతున్న జాతుల పరిరక్షణకు సాయపడుతుందని భావిస్తున్నారు.
అవసరం లేని ఆడ లేదా మగ జంతువులను పలు రూపాల్లో వదిలించుకోవడం సాధారణంగా జరుగుతూ ఉంటుంది. అయితే జననానికి ముందే తెలుసుకొని నియంత్రించుకోవడం ద్వారా దీన్ని తగ్గించుకోవచ్చు. వ్యవసాయ రంగంలో కానీ, పరిశోధనల సమయంలో గానీ కొన్ని సందర్భాల్లో ఒకే లింగ(సేమ్ సెక్స్) జంతువులు అవసరం అవుతుంటాయి. ఉదాహరణకు ఒక రైతుకు పొలంలో సేద్యానికి ఎద్దులు, దున్నపోతులు వంటివి ఉపయోపడుతాయి. ఇదే సమయంలో ఇంటి వద్ద పాల అవసరాలకు ఆవులు, బర్రెలను కోరుకుంటాడు. తనకు అవసరపడని వాటిని మాంసం కేంద్రాలకు అమ్మేస్తుంటాడు. అదేవిధంగా పునరుత్పత్తి వ్యవస్థ, లింగ ఆధారిత వ్యాధులు, ప్రత్యేక హర్మోన్లకు సంబంధించి పరిశోధనల సమయంలో ఒకే లింగ జంతువులే అవసరం అవుతుంటాయి.