పన్ను ఆదాతోపాటు.. రాబడీ ముఖ్యమే

పన్ను ఆదా చేయడం కోసం చివరి రోజులు ఇవే. ఇప్పటికే ఏటా చేస్తున్న ఇన్సూరెన్స్‌ ప్రీమియం లాంటివి కాకుండా ఇంకా చేయాల్సివస్తే ఎలాంటి సాధనాల్లో చేయాలనే సందిగ్ధత అందిరిలోనూ ఉంటుంది. దానికి తోడు ఎంత పన్ను చెల్లించాలో తెలిస్తే సాధ్యమైనంత ఎక్కువగా ఆదా చేయడానికి, అందుకు తగ్గట్టుగా పన్ను ప్రణాళికను రూపొందించుకోవడానికి అవకాశం ఉంటుంది. https://www.incometaxindiaefiling.gov.in అనే వెబ్‌సైట్లో మన ఆదాయాలు, సేవింగ్స్‌, వ్యయాలను పొందుపరిస్తే పన్ను ఎంత చెల్లించాలో గణించి చెప్పేసే వీలును కల్పించారు.

• 

పన్ను కోసం ఆదా చేస్తున్నాం కనుక రాబడి విషయంలో రాజీ పడాల్సిన అవసరం లేదు. అలాగే పన్ను ఆదా కోసం చేసే మదుపులో రిస్కును భరించే శక్తి, లాక్‌ఇన్‌ పీరియడ్‌ లాంటి అంశాలను దృష్టిలో ఉంచుకోవాలి. సాధారణంగా టాక్స్‌ సేవింగ్‌ సాధనాల్లో కనీసం మూడేండ్ల లాక్‌ఇన్‌ పీరియడ్‌ ఉంటుంది. ఈ కాలంలో మనం మదుపు చేసిన ఆర్థిక సాధనం బెంచ్‌మార్క్‌ రాబడుల కన్నా అధికంగా రాబడి ఇస్తుందో లేదో చూసుకోవాలి. కొత్త ఆదాయ పన్ను నిబంధనల ప్రకారం ప్రస్తుత పన్ను చెల్లింపుదారులు ఇప్పటికే ఉన్న డిడక్షన్లను కొగసాగిస్తూ పాత పన్ను పద్ధతులనే అనుసరించవచ్చు. లేదా డిడక్షన్స్‌ ఆప్షన్‌ లేకుండా కొత్త ఆదాయ పన్ను నిబంధనలను ఎంచుకునే స్వేచ్ఛ ఉంది. వేర్వేరు పన్ను ఆదా సాధానాల్లో వచ్చే రాబడి, లాక్‌ఇన్‌ పీరియడ్‌ లాంటి వివరాలను చూద్దాం.

సెక్షన్‌80జీ కింద మినహాయింపు
ప్రధానమంత్రి నేషనల్‌ రిలీఫ్‌ ఫండ్‌ స్వచ్ఛ భారత్‌ ఖోష్‌ తదితర సంస్థలకు ఇచ్చే విరాళాలను గరిష్ఠంగా రూ.2000 వరకు మినహాయింపు పొందవచ్చు.

ఈక్విటీ లింక్డ్‌ సేవింగ్స్‌ స్కీమ్‌
ఆదాయపన్ను చట్టం సెక్షన్‌ 80సీ కింద అత్యంత ఉత్తమ మార్గం ఇది. ఈక్విటీ మార్కెట్లలో మదుపు చేయడంపాటు మూడేండ్ల లాక్‌ఇన్‌ పీరియడ్‌ ఉండడం వల్ల రాబడులు అధికంగా ఉంటాయి. రూ.లక్ష లోపు రాబడిపై దీర్ఘకాల క్యాపిటల్‌ గెయిన్స్‌ టాక్స్‌ చార్జ్‌ చేయరు.

పబ్లిక్‌ ప్రావిడెంట్‌ ఫండ్‌ (పీపీఎఫ్‌)
పీపీఎఫ్‌ దీర్ఘకాల సేవింగ్స్‌ స్కీం. ఇది 15 ఏండ్ల లాక్‌ఇన్‌ పీరియడ్‌ను కలిగి ఉంటుంది. ఐదేండ్ల చొప్పున స్కీం కాలపరిమితిని పెంచుకోవచ్చు. దీనిపై వచ్చే వడ్డీ ఆదాయం కూడా పన్ను పరిధిలోకి రాదు.

జీవిత బీమా
తన తదనంతరం కుటుంబ భద్రత కోసం తీసుకొనే ధీమా ఇది. చెల్లించే ప్రీమియంలను కేవలం పన్ను ఆదా కోసమే అని పరిగణించకుండా కుటుంబ భద్రత కోసంగా పరిగణించాలి. చెల్లించే ప్రీమియంలకు 80సీ కింద పన్నుమినహాయింపు ఉంటుంది.

ఫిక్స్‌డ్‌ డిపాజిట్లు
ఐదేండ్ల కాలం పరిమితికి పైగా చేసే ఫిక్స్‌డ్ డిపాజిట్లపై 80సీ కింద పన్ను ఆదా చేయవచ్చు. అయితే కాలపరిమితికి ముందుగానే, విపత్కర పరిస్థితుల్లో విత్‌డ్రా చేసుకుంటే పన్ను ఆదా బెనిఫిట్స్‌ ఉండవు. అలాగే వీటిపై వచ్చే వడ్డీపై కూడా పన్ను ఆదా ఉండదు.

నేషనల్‌ పెన్షన్‌ స్కీమ్‌
రిటైర్మెంట్‌ తర్వాత ఇన్వెస్టర్లకు భద్రత కల్పించే స్కీం ఇది. ప్రిన్సిపల్‌ మొత్తం లక్షన్నర వరకు సెక్షన్‌ 80సీ కింద మినహాయింపు ఉంటుంది. సెల్ఫ్‌ ఎంప్లాయ్డ్‌ వ్యక్తులకు మరో 50 వేల వరకు సెక్షన్‌ 80సీసీడీ కింద మినహాయింపు.

హోమ్‌ లోన్‌ డిడక్షన్‌
హోమ్‌ లోన్‌ తీసుకున్నఇంటి యజమానులు సెక్షన్‌ 24 కింద వడ్డీ చెల్లింపుపై డిడక్షన్‌ క్లెయిమ్‌ చేసుకోవచ్చు. ఒకవేళ హోమ్‌ లోన్‌ తీసుకుని కొన్న ఇంట్లోనే యజమానులు ఉంటే గరిష్ఠంగా రెండు లక్షల వరకు పన్ను మినహాయింపును పొందవచ్చు.

విద్యా రుణాలు
సెక్షన్‌ 80ఈ కింద పిల్లల ఉన్నత విద్య కోసం తీసుకున్న రుణాలపై చెల్లించే వడ్డీని డిడక్షన్‌గా క్లెయిమ్‌ చేయవచ్చు. అయితే విద్యా రుణాలు చెల్లించే సమయం నుంచే ఈ మినహాయింపు వర్తిస్తుంది. అలాగే అప్పటి నుంచి ఎనిమిదేండ్ల కాలానికి మాత్రమే ఈ మినహాయింపు పరిమితం.