జేఎస్‌డబ్ల్యూ ఈవీ వాణిజ్య వాహనాలు.. యామ్‌స్టార్‌ బ్రాండ్‌తో ట్రక్కులు, బస్సుల విడుదల

జేఎస్‌డబ్ల్యూ గ్రూపునకు చెందిన జేఎస్‌డబ్ల్యూ గ్రీన్‌టెక్‌ తాజాగా కమర్షియల్‌ ఎలక్ట్రిక్‌ వాహన విభాగంలోకి అడుగుపెట్టింది. యామ్‌స్టార్‌ బ్రాండ్‌తో ట్రక్కులు, బస్సులను అందుబాటులోకి తీసుకొచ్చింది.

ముంబై, సెప్టెంబర్‌ 22: జేఎస్‌డబ్ల్యూ గ్రూపునకు చెందిన జేఎస్‌డబ్ల్యూ గ్రీన్‌టెక్‌ తాజాగా కమర్షియల్‌ ఎలక్ట్రిక్‌ వాహన విభాగంలోకి అడుగుపెట్టింది. యామ్‌స్టార్‌ బ్రాండ్‌తో ట్రక్కులు, బస్సులను అందుబాటులోకి తీసుకొచ్చింది. వచ్చే నెలలో దేశీయ మార్కెట్లోకి అందుబాటులోకి రానున్న ఈ ఎలక్ట్రిక్‌ బస్సులు, ట్రక్కులను ఉత్పత్తి చేయడానికి రూ.2,500 కోట్ల పెట్టుబడితో మహారాష్ట్రలో ప్రత్యేక ప్లాంట్‌ను ఏర్పాటు చేసినట్టు జేఎస్‌డబ్ల్యూ గ్రూపు చైర్మన్‌ సజ్జన్‌ జిందాల్‌ తెలిపారు.

ప్రస్తుతం ఈ ప్లాంట్‌ ఏడాదికి 15 వేల యూనిట్ల బస్సులు, ట్రక్కులు ఉత్పత్తి అవుతుండగా, డిమాండ్‌ అధికంగా ఉంటే వచ్చే కొన్నేండ్లులో ఈ సామర్థ్యాన్ని రెండింతలు 30 వేల యూనిట్లకు పెంచుకునే అవకాశం ఉందన్నారు.

మంగళవారం ఆవిష్కరించిన వాహనాల్లో బస్సులు 7 మీటర్ల నుంచి 18 మీటర్ల పొడువు కలిగినవి కాగా, ట్రక్కులు 55 టన్నుల కంటే అధిక సామర్థ్యంతో తీర్చిదిద్దినవి. 150 కిలోవాట్ల నుంచి 500 కిలోవాట్ల లోపు బ్యాటరీ సామర్థ్యంతో రూపొందించిన ఈ వాహనాలు రూ.80 లక్షల ప్రారంభ ధరతో లభించనున్నాయని అంచనా.