‘హిట్‌’ ఒక సీజన్‌లా మారాలి

అడివి శేష్‌ హీరోగా నటిస్తున్న సినిమా ‘హిట్‌ 2’. మీనాక్షి చౌదరి నాయికగా కనిపించనుంది. ఈ చిత్రాన్ని వాల్‌ పోస్టర్‌ సినిమా పతాకంపై నాని, ప్రశాంతి త్రిపిరనేని నిర్మిస్తున్నారు.

అడివి శేష్‌ హీరోగా నటిస్తున్న సినిమా ‘హిట్‌ 2’. మీనాక్షి చౌదరి నాయికగా కనిపించనుంది. ఈ చిత్రాన్ని వాల్‌ పోస్టర్‌ సినిమా పతాకంపై నాని, ప్రశాంతి త్రిపిరనేని నిర్మిస్తున్నారు. శైలేష్‌ కొలను దర్శకుడు. డిసెంబర్‌ 2న విడుదల కానుంది. తాజాగా చిత్ర ప్రీ రిలీజ్‌ కార్యక్రమం దర్శకుడు రాజమౌళి అతిథిగా హైదరాబాద్‌లో జరిగింది. రాజమౌళి మాట్లాడుతూ…“హిట్‌’ చిత్రాన్ని సినిమాలా కాకుండా ఫ్రాంచైజీలా చేసినందుకు చిత్ర దర్శక నిర్మాతలకు అభినందనలు. ఇలా ఫ్రాంచైజీ చేయడం అంత సులువు కాదు. ఈ చిత్రానికి అడివి శేష్‌ ఎనర్జీని తీసుకొచ్చారు. ట్రైలర్‌ ఇంప్రెసివ్‌గా ఉంది. ‘హిట్‌ 3’, ‘హిట్‌ 4’, ‘హిట్‌ 5’ వరుసగా రాబోతున్నాయి. ‘హిట్‌’ అనేది ఒక సీజన్‌ కావాలి’ అన్నారు. నిర్మాత నాని మాట్లాడుతూ…‘ఈ సినిమా మీద ప్రేమ, గౌరవంతో పనిచేశాం. శేష్‌ మంచి నటుడు. ప్రేక్షకుల అంచనాలను తక్కువ చేయకుండా నటిస్తారు. ‘హిట్‌ 3’ నుంచి ‘హిట్‌ 7’ వరకు సినిమాలు వస్తాయి. చివరి సినిమాలో ఈ హీరోలందర్నీ కలుపుతానని శైలేష్‌ మాటిచ్చాడు.

ఈ చిత్రానికి ఒక నిర్మాతగా కంటే ఒక ప్రేక్షకుడిగా ఎక్కువ ఉత్సుకతతో వేచి చూస్తున్నా’ అన్నారు. హీరో అడివి శేష్‌ మాట్లాడుతూ…‘ఈ కథలో భాగమైనందుకు సంతోషంగా ఉంది. తదుపరి సినిమాలోనూ నేను ఉంటానని చెప్పడం సంతోషాన్నిచ్చింది. నా గత చిత్రాలపై ఎలాంటి నమ్మకాన్ని ఉంచి థియేటర్‌లకు వచ్చారో, అలాగే ఈ సినిమాకూ రండి. తప్పకుండా ఆస్వాదిస్తారు. హిందీలో కూడా ఈ సినిమాను డబ్బింగ్‌ చేయబోతున్నాం. ఆ తేదీని త్వరలో ప్రకటిస్తాం’ అన్నారు. దర్శకుడు శైలేష్‌ కొలను మాట్లాడుతూ…‘అనేక భావోద్వేగాలతో సాగే చిత్రమిది. నేను ఊహించిన ‘హిట్‌’ ప్రపంచం ఇవాళ నిజమైనందుకు సంతోషంగా ఉంది. ఈ ఫ్రాంచైజీని మరింత విస్తృతం చేసేందుకు ప్రయత్నం చేశాం. నాని హీరోగా ఓ చిత్రాన్ని రూపొందించాలనేది నా డ్రీమ్‌. త్వరలోనే అది నెరవేరుతుందని ఆశిస్తున్నా’ అన్నారు.