వేసవిలో వినోదాల హంగామా

వెంకటేష్‌, వరుణ్‌తేజ్‌ కథానాయకులుగా నటిస్తున్న చిత్రం ‘ఎఫ్‌-3’. అనిల్‌ రావిపూడి దర్శకుడు. ప్రముఖ నిర్మాత దిల్‌రాజు సమర్పణలో శిరీష్‌ నిర్మిస్తున్నారు. మే 27న ప్రపంచవ్యాప్తంగా విడుదల కానుంది. ఈ సినిమాలోని రెండో సింగిల్‌ ‘ఊ..ఆ..ఆహా..ఆహా..’ అనే గీతాన్ని ఈ నెల 22న విడుదల చేయబోతున్నారు. ఈ సందర్భంగా కొత్త పోస్టర్‌ను విడుదల చేశారు. ఇందులో చిత్ర ప్రధాన తారాగణమంతా రోప్‌ పుల్లింగ్‌ ఆడుతూ కనిపించారు. ‘ఆద్యంతం హాస్య ప్రధానంగా సాగే చిత్రమిది. డబ్బు వల్ల వచ్చే సమస్యల చుట్టూ కథ నడుస్తుంది. ఈ క్రమంలో పండే వినోదం కడుపుబ్బా నవ్విస్తుంది. మండువేసవిలో వినోదాల జల్లులతో సేద తీరుస్తుంది’ అని చిత్రబృందం పేర్కొంది. తమన్నా, మెహరీన్‌, సోనాల్‌చౌహాన్‌, రాజేంద్రప్రసాద్‌ తదితరులు నటిస్తున్న ఈ చిత్రానికి కెమెరా: సాయిశ్రీరామ్‌, ఆర్ట్‌: ఏ.ఎస్‌.ప్రకాష్‌, సంగీతం: దేవిశ్రీప్రసాద్‌, నిర్మాణ సంస్థ: శ్రీ వెంకటేశ్వర క్రియేషన్స్‌, దర్శకత్వం: అనిల్‌ రావిపూడి.