ISRO | రేపు తెల్లవారు జామున నింగిలోకి ఈవోఎస్‌-05 ఉపగ్రహం

ISRO | ఇస్రో మరో ప్రయోగం చేపట్టనుంది. రేపు తెల్లవారు జామున నింగిలోకి ఒక ఉపగ్రహాన్ని ప్రయోగించనుంది. భూ పరిశీలనలో నూతన టెక్నాలజీతో రూపొందించిన ఈ ఉపగ్రహాన్ని నిర్ణీత కక్ష్యలో ప్రవేశ పెట్టనున్నారు.

ISRO | ఇస్రో సుమారు ఎనిమిది నెలల తరువాత అంతరిక్ష ప్రయోగానికి సిద్ధమైంది. GSLV-F17 రాకెట్‌ ద్వారా EOS-05 ఉపగ్రహాన్ని ప్రయోగించనున్నారు. ఇందుకు శుక్రవారం 4వ తేదీ తెల్లవారు జామున 2:55 నిమిషాలకు ముహూర్తం పెట్టారు. దీన్ని శ్రీహరికోటలోని సతీశ్‌ ధావన్‌ సెంటర్‌లోని రెండో ప్రయోగ వేదిక నుంచి నింగిలోకి పంపేందుకు ఏర్పాట్లు చేశారు. ఈ ఉపగ్రహాన్ని GISAT-1A కూడా పిలుస్తారు. పూర్తి స్వదేశీ పరిజ్ఞానంతో రూపొందించిన మొట్టమొదటి ఇమేజింగ్‌ ఉపగ్రహంగా ఈ ఉపగ్రహం నిలువనుంది. అత్యంత అధునాతన టెక్నాలజీతో దీన్ని రూపొందించారు.

ఈవోఎస్‌-05 శాటిలైట్‌ ఇతర భూ పరిశీలన ఉపగ్రహాలన్నింటి కంటే ప్రభావంతం పనిచేస్తుంది. వాతావరణ, పర్యావరణ, తుఫానులు, వరదలు, వ్యవసాయం, అడవులు వంటి భౌగోళిక మార్పులను క్షుణ్ణంగా అధ్యయనం చేయడానికి ఈ ఉపగ్రహం ఉపయోగపడుతుందని సైంటిస్టులు భావిస్తున్నారు. GSLV-F17 జీఎస్‌ఎల్‌వీ ప్రయోగాల్లో 19వది. ఈ రాకెట్‌ చేపట్టిన 18 ప్రయోగాల్లో 6 విఫలమయ్యాయి. ప్రారంభంలో ఈ రాకెట్‌ ప్రవర్తన వల్ల దీనికి నాటీ బాయ్‌ అనే పేరు పెట్టారు ఇస్రో సైంటిస్టులు.