కృష్ణ ప్రశంసించారు

‘సినిమా హీరో కావాలని కలలుకనే ఓ యువకుడి కథ ఇది. ఇప్పటివరకు ఎవరూ స్పృశించని కొత్త పాయింట్‌తో సినిమాను తెరకెక్కించాం’ అని అన్నారు శ్రీరామ్‌ ఆదిత్య. ఆయన దర్శకత్వం వహించిన చిత్రం ‘హీరో’. అశోక్‌ గల్లా కథానాయకుడు. పద్మావతి గల్లా నిర్మించారు. ఈ నెల 15న విడుదలకానుంది. శ్రీరామ్‌ ఆదిత్య మాట్లాడుతూ ‘రెగ్యులర్‌ కమర్షియల్‌ సినిమాలకు భిన్నమైన కథ, కథనాలతో సాగుతుంది. ఆద్యంతం నవ్వుల్ని పంచుతుంది. సినిమాల ప్రభావం సమాజంలోని చాలా మందిపై కనిపిస్తుంటుంది. హీరో అనే మాటతో ప్రతిఒక్కరికి అనుబంధం ఉంటుంది. ఆ అంశాల నుంచి స్ఫూర్తి పొందుతూ ఈ కథ రాసుకున్నా. అశోక్‌ గల్లాకు తొలి సినిమా అయినా పరిణతితో కూడిన అభినయాన్ని కనబరిచారు. కౌబాయ్‌గా, జోకర్‌గా భిన్న గెటప్‌లలో అశోక్‌ కనిపిస్తాడు. అభినయపరంగా నిధి అగర్వాల్‌కు ఈ సినిమా మంచి పేరుతెచ్చిపెడుతుంది. సీనియర్‌ హీరో కృష్ణగారు ఈ సినిమా చూసి ప్రశంసించారు. పండుగకు తెలుగు ప్రేక్షకులకు పరిపూర్ణ వినోదాన్ని పంచే సినిమాగా నిలుస్తుంది’ అని తెలిపారు.