woman found dead | మహిళ సూసైడ్‌.. ఇన్సూరెన్స్ కంపెనీ ఉన్నతాధికారి అరెస్ట్‌

woman found dead | అద్దె ఇంట్లో నివసిస్తున్న మహిళ అనుమానాస్పదంగా మరణించింది. ఆత్మహత్యకు పాల్పడిన ఆమె సూసైడ్‌ నోట్‌ రాసింది. ఈ నేపథ్యంలో ఆ మహిళ పని చేసే ఇన్సూరెన్స్ కంపెనీకి చెందిన ఉన్నతాధికారిని పోలీసులు అరెస్ట్‌ చేశారు.

గువాహటి: అద్దె ఇంట్లో నివసిస్తున్న మహిళ అనుమానాస్పదంగా మరణించింది. ఆత్మహత్యకు పాల్పడిన ఆమె సూసైడ్‌ నోట్‌ రాసింది. ఈ నేపథ్యంలో ఆ మహిళ పని చేసే ఇన్సూరెన్స్ కంపెనీకి చెందిన ఉన్నతాధికారిని పోలీసులు అరెస్ట్‌ చేశారు. (woman found dead) అస్సాం రాజధాని గువాహటిలో ఈ సంఘటన జరిగింది. సువాల్‌కుచి ప్రాంతానికి చెందిన 29 ఏళ్ల మహిళ ఒక ఇన్సూరెన్స్ కంపెనీలో పని చేస్తున్నది. మంగళవారం ఆమె నివసించే హెంగ్రాబారి ప్రాంతంలోని అద్దె ఇంట్లో సూసైడ్‌ చేసుకున్నది.

కాగా, ఆ ఇంటి యజమాని సమాచారంతో పోలీసులు అక్కడకు చేరుకున్నారు. డోర్‌ బ్రేక్‌ చేసి ఇంట్లోకి వెళ్లి చూడగా ఆ మహిళ మృతదేహం సీలింగ్ ఫ్యాన్‌కు వేలాడుతూ కనిపించింది. ఆమె రాసిన ఒక సూసైడ్ నోట్‌ను పోలీసులు స్వాధీనం చేసుకున్నారు.

మరోవైపు ఆ మహిళ పని చేస్తున్న ఇన్సూరెన్స్ కంపెనీ సీనియర్‌ అధికారి అయిన బిశ్వనాథ్ దాస్ తనను మానసికంగా, శారీరకంగా వేధించినట్లు ఆ నోట్‌లో ఆమె ఆరోపించింది. ఈ నేపథ్యంలో పశ్చిమ బెంగాల్‌లోని పురూలియాకు చెందిన ఆయనను పోలీసులు అరెస్ట్‌ చేశారు. ఆ మహిళను ఆత్మహత్యకు అతడు ప్రేరేపించినట్లు కేసు నమోదు చేసి దర్యాప్తు చేస్తున్నారు.