లక్నో: బీజేపీ ఎమ్మెల్యే కొడుకు ఇండిపెండెంట్గా నామినేషన్ వేశాడు. దీనిపై ఆ పార్టీ ఆగ్రహం వ్యక్తం చేసింది. బీజేపీ ఎమ్మెల్యేకు నోటీస్ జారీ చేసింది. (BJP Issues Notice To UP MLA) ఉత్తరప్రదేశ్లోని ఫతేపూర్ సిక్రీ లోక్సభ స్థానంలో ప్రస్తుత ఎంపీ రాజ్కుమార్ చాహర్ను బీజేపీ తిరిగి ఎన్నికల బరిలోకి దింపింది. అయితే ఫతేపూర్ సిక్రీ బీజేపీ ఎమ్మెల్యే బాబులాల్ చౌదరి కుమారుడు రామేశ్వర్ చౌదరి కూడా ఈ స్థానం నుంచి పోటీ చేస్తున్నారు. స్వతంత్ర అభ్యర్థిగా ఆయన నామినేషన్ దాఖలు చేశారు.
కాగా, దీనిపై బీజేపీ ఆగ్రహం వ్యక్తం చేసింది. కుమారుడ్ని ఎన్నికల బరిలోకి దించిన పార్టీ ఎమ్మెల్యే బాబులాల్ చౌదరి తీరుపై ఆ పార్టీ మండిపడింది. యూపీ బీజేపీ ఆయనకు షోకాజ్ నోటీసు జారీ చేసింది. ఉత్తరప్రదేశ్ రాష్ట్ర బీజేపీ అధ్యక్షుడు భూపేంద్ర సింగ్ చౌదరి ఆదివారం బాబూలాల్ చౌదరికి షోకాజ్ నోటీసు జారీ చేశారని బీజేపీ రాష్ట్ర ప్రధాన కార్యదర్శి గోవింద్ నారాయణ్ శుక్లా తెలిపారు. మీపై క్రమశిక్షణా చర్యలు ఎందుకు తీసుకోకూడదో అన్న దానిపై సోమవారం సాయంత్రం 5 గంటలలోపు సమాధానం చెప్పాలని ఆ నోటీస్లో కోరినట్లు ఆయన పేర్కొన్నారు.