రైతుల్ని చంపిన శివరాజ్‌కు వ్యవసాయ మంత్రి పదవా?

కేంద్ర వ్యవసాయ మంత్రిగా శివరాజ్‌ సింగ్‌ చౌహాన్‌ను నియమించడం పట్ల అఖిల భారత కిసాన్‌ సభ (ఏఐకేఎస్‌) తీవ్ర నిరసన వ్యక్తం చేసింది.

న్యూఢిల్లీ, జూన్‌ 11: కేంద్ర వ్యవసాయ మంత్రిగా శివరాజ్‌ సింగ్‌ చౌహాన్‌ను నియమించడం పట్ల అఖిల భారత కిసాన్‌ సభ (ఏఐకేఎస్‌) తీవ్ర నిరసన వ్యక్తం చేసింది. మధ్యప్రదేశ్‌లోని మందసౌర్‌ ఘటనకు కారకుడై ఆరుగురు రైతులను పొట్టనబెట్టుకున్న ఆయనకు వ్యవసాయ మంత్రి పదవి ఎలా కట్టబెడతారని ప్రశ్నిస్తూ మంగళవారం ఒక ప్రకటన విడుదల చేసింది.

2017, జూన్‌ 6న ఆయన పాలనలో మధ్యప్రదేశ్‌లోని మందసౌర్‌లో పోలీసులు, సీఆర్‌పీఎఫ్‌ జవాన్లు జరిపిన కాల్పుల్లో ఆరుగురు రైతులు అమరులయ్యారని తెలిపింది. కాగా, పీఎం కిసాన్‌ నిధి 17వ వాయిదా మొత్తాన్ని విడుదల చేయాలని కేంద్ర మంత్రివర్గం నిర్ణయించడం కంటితుడుపేనని పేర్కొంది. దేశంలోని 159 గ్రామీణ ప్రాంత సీట్లలో బీజేపీ నేతృత్వంలోని ఎన్డీఏ ఓటమి పాలైనా వారు ఎలాంటి గుణపాఠాలు నేర్చుకోలేదని విమర్శించింది.