Miss Universe | విశ్వ సుందరిగా నికరాగ్వా చిన్నది.. ప్రతిష్టాత్మక కిరీటాన్ని గెల్చుకున్న షెన్నిస్‌ పలాసియోస్‌

ప్రతిష్టాత్మక 2023 విశ్వ సుందరి కిరీటాన్ని నికరాగ్వా చిన్నది షెన్నిస్‌ పలాసియోస్‌ గెల్చుకుంది. 23 ఏండ్ల షెన్నిస్‌.. నికరాగ్వాలో ఆడియో విజువల్‌ నిర్మాత, మానసిక కార్యకర్తగా పనిచేస్తున్నారు.

Miss Universe | న్యూఢిల్లీ, నవంబర్‌ 19: ప్రతిష్టాత్మక 2023 విశ్వ సుందరి కిరీటాన్ని నికరాగ్వా చిన్నది షెన్నిస్‌ పలాసియోస్‌ గెల్చుకుంది. 23 ఏండ్ల షెన్నిస్‌.. నికరాగ్వాలో ఆడియో విజువల్‌ నిర్మాత, మానసిక కార్యకర్తగా పనిచేస్తున్నారు. అంతర్జాతీయ అందాల పోటీలలో ఆ దేశానికిది మొదటి విజయం. శనివారం రాత్రి జరిగిన మిస్‌ యూనివర్స్‌ 72వ ఎడిషన్‌ పోటీలలో విజేతగా నిలిచిన షెన్నిస్‌కు అమెరికాకు చెందిన 2022 మిస్‌ యూనివర్స్‌ ఆర్‌.బన్నీ గాబ్రియేల్‌ కిరీటాన్ని అలంకరించారు.

ఈ పోటీలలో మిస్‌ థాయ్‌లాండ్‌ అన్నటోనియా పోర్సిడ్‌ మొదటి రన్నరప్‌గా, మిస్‌ ఆస్ట్రేలియా మోరడా విల్సన్‌ రెండో రన్నరప్‌గా నిలిచారు. శాన్‌ సాల్వడర్‌ వేదికగా జరిగిన ఈ పోటీల్లో 84 మంది పోటీపడ్డారు. భారత్‌కు చెందిన మిస్‌ ఇండియా శ్వేత శారద కూడా పాల్గొని టాప్‌ 20లో నిలిచారు. అలాగే తొలిసారి పాకిస్థాన్‌ తరఫున ఎరికా రాబిన్‌ పాల్గొన్నారు.