Weight Loss | వెయిట్‌ లాస్‌ మందులతో కంటిచూపు పోయే ప్రమాదం!

ఒబెసిటీ, డయాబెటిస్‌ బాధితులకు ఇచ్చే పలు ఔషధాల వల్ల అరుదైన కంటి సమస్య వచ్చే ముప్పు ఉందని వెల్లడైంది.

Weight Loss | న్యూఢిల్లీ: ఒబెసిటీ, డయాబెటిస్‌ బాధితులకు ఇచ్చే పలు ఔషధాల వల్ల అరుదైన కంటి సమస్య వచ్చే ముప్పు ఉందని వెల్లడైంది. అమెరికాలోని మసాచుసెట్స్‌ ఐ అండ్‌ ఇయర్‌ హాస్పిటల్‌ పరిశోధకుల బృందం చేసిన ఈ అధ్యయనం వివరాలు అమెరికన్‌ మెడికల్‌ అసోసియేషన్‌ ఆప్తమాలజీ జర్నల్‌లో ప్రచురితమయ్యాయి.

మధుమేహం ఉన్న వారికి ఇన్సులిన్‌ ఉత్పత్తిని పెంచి షుగర్‌ లెవల్స్‌ అదుపులో ఉండటానికి ఉపయోగపడేందుకు, ఊబకాయంతో బాధపడుతున్న వారికి బరువు తగ్గేందుకు గానూ ఒజెంపిక్‌, విగోవి వంటి ఔషధాలను వైద్యులు సిఫార్సు చేస్తున్నారు.

సెమాగ్లుటైడ్‌ అనే ప్రొటీన్‌ ఉన్న ఈ మందులు వాడే ఊబకాయ బాధితులకు మిగతా వారి కంటే ‘నాన్‌-ఆర్టెరిటిక్‌ ఆంటీరియర్‌ ఇషెమిక్‌ ఆప్టిక్‌ న్యూరోపతి’ సమస్య వచ్చే అవకాశం ఏడు రెట్లు ఎక్కువ ఉందని పరిశోధకులు గుర్తించారు. మధుమేహ బాధితులకు ఈ ముప్పు నాలుగు రెట్లు ఎక్కువ ఉంటుందని పేర్కొన్నారు. ఈ సమస్య వల్ల హఠాత్తుగా ఒక కన్ను చూపు కోల్పోయే ప్రమాదం ఉంటుందని తెలిపారు.